মহাৰাষ্ট্ৰৰ দৰে অসমতো খিলঞ্জীয়া ভাষাৰ শিক্ষা বাধ্যতামূলক কৰাৰ আহ্বান সাহিত্য সভাৰ

আইন প্ৰণয়নৰ যোগেদি মহাৰাষ্ট্ৰৰ চি বি এছ ই, আই চি এছ ই-কে ধৰি সকলো বিদ্যালয়ত মাৰাঠী ভাষাৰ শিক্ষা বাধ্যতামূলক কৰাৰ বাবে মহাৰাষ্ট্ৰৰ মুখ্য মন্ত্ৰী দেৱেন্দ্ৰ ফাড়নবিশে অলপতে বিধান পৰিষদত কৰা ঘোষনাক বিপুলভাৱে আদৰণি জনাইছে অসম সাহিত্য সভাৰ সভাপতি পৰমানন্দ ৰাজবংশীয়ে।

সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তি যোগে তেওঁ কয়, ‘মহাৰাষ্ট্ৰৰ দায়িত্বশীল মুখ্য মন্ত্ৰী হিচাপে দেৱেন্দ্ৰ ফাড়নবিশে মাৰাঠী ভাষা ৰক্ষাৰ ক্ষেত্ৰত গভীৰ তৎপৰতাৰে গ্ৰহণ কৰা এই ব্যৱস্থাই আশাপদ ভূমিকা পালন কৰিব।

বিবৃতিটোত ৰাজবংশীয়ে মহাৰাষ্ট্ৰৰ দৰে অসমতো মুখ্য মন্ত্ৰী সৰ্বানন্দ সোণোৱালে অসম সাহিত্য সভা, খিলঞ্জীয়া জনজাতীয় সাহিত্য সভা আৰু অসম চৰকাৰৰ ভাষা বিশেষজ্ঞ সমিতিৰ দ্বাৰা প্ৰায় এক বছৰৰ পূৰ্বে চূড়ান্ত কৰা ভাষা নীতিৰ অধীনত অসমৰ চি বি এছ ই, আই চি এছ ই-কে ধৰি সকলো বিদ্যালয়তে অসমীয়া ভাষা তথা অন্যান্য খিলঞ্জীয়া ভাষাসমূহৰ দ্বাৰা বাধ্যতামূলক শিক্ষা প্ৰদানৰ নিমিত্তে ব্যৱস্থা গ্ৰহণ কৰিব বুলি আশা প্ৰকাশ কৰে।

সেই উদ্দেশ্যে আগন্তুক বিধানসভা অধিৱেশনতে অসমত ৰাজ্যভাষা আইন কাৰ্যকৰীকৰণৰ বাবে সভাই মুখ্য মন্ত্ৰীক দাখিল কৰা প্ৰস্তাৱ ওপৰত কাৰ্যকৰী ব্যৱস্থা গ্ৰহণ কৰিবলৈ আহ্বান জনায়।