সম্বৰ্ধনা নহয়, মৰম-আশীৰ্বাদ ল’বলৈহে অসমলৈ আহিছো : ধিং এক্সপ্ৰেছ হিমা
‘মই সম্বৰ্ধনা ল’বলৈ অসমলৈ অহা নাই। মৰম-আশীৰ্বাদ ল’বলৈ আহিছো। নগাঁৱৰ পিছত ধিঙত আশীৰ্বাদ ল’ম।’ আজি নগাঁৱৰ খগেন মহন্ত প্ৰেক্ষাগৃহত অনুষ্ঠিত সম্বৰ্ধনা সভাত সম্বৰ্ধনা গ্ৰহণ কৰি স্বৰ্ণ কন্যা হিমা দাসে এইদৰে কয়।
নগাঁও ক্ৰীড়া সংস্থা আৰু নগাঁও জিলা প্ৰশাসনৰ উদ্যোগত অনুষ্ঠিত সম্বৰ্ধনা অনুষ্ঠানত হিমাই লগতে কয়, ‘কালিলৈৰ পৰা ঘৰত থাকিম। দুদিনৰ পিছত ঘূৰি যাম। পুনৰ প্ৰশিক্ষণ আৰম্ভ কৰিম। বহুত গামোচা পাইছো। বৰদেউতাক কোঠা এটা বনাব কৈছো। ভালকৈ থম। অসমৰ বাহিৰত আৰু গামোচা উৰুৱাম।’
চৰকাৰৰ প্ৰতি আহ্বান জনাই দৌৰ কন্যা গৰাকীয়ে কয়, ‘নতুন ষ্টেডিয়ামখন সোনকালে নিৰ্মাণ কৰিব লাগে। নতুন নতুন খেলুৱৈক আগবঢ়াই আনিব লাগিব। প্ৰশিক্ষক আনি শিবিৰ পাতি খেলুৱৈক আগবঢ়াই নিব লাগিব। অহাবাৰ দহজনে মেডেল লৈ প্ৰধান মন্ত্ৰীৰ লগত ফটো উঠিম। ইয়াৰ বাবে সহযোগ সকলোৰে লাগিব।’
জাতি-ভেদ পৰিহাৰ কৰি এক অসমীয়া হৈ আগবাঢ়িব লাগিব বুলি উল্লেখ কৰি মাজুলী, কাজিৰঙা, চাহৰ বাবে অসম বিশ্বই চিনি পোৱা অসমক আৰু জিলিকাব লাগিব বুলি মন্তব্য কৰে।
তদুপৰি অসমৰ সংবাদ মাধ্যমক উচ্চ প্ৰশংসা কৰি হিমাই কয়, ‘সংবাদ মাধ্যমে গাঁৱৰ পৰা খেলুৱৈ উলিয়াই আনিব লাগিব। ভাল খেলুৱৈ নিৰ্বাচন কৰাৰ ক্ষেত্ৰত অগ্ৰণী ভূমিকা ল’ব লাগিব।’
আনহাতে, নৱম শ্ৰেণীত পঢ়ি থাকোতে পুলিচৰ লাঠি কাঢ়ি অনাৰ কথা ব্যক্ত কৰি হিমাই কয়, ‘আজি মোৰ কাৰণে মা-দেউতাই হাঁহিব পাৰিছে। মই সুখী। দেউতা ফুটবল খেলুৱৈ আছিল। খেলিলে পইচা পায়।’ হিমাৰ নিৰাপত্তাৰক্ষী হিচাপে নিয়োজিত কৰা দুই বীৰাংগনাকো তেওঁ উচ্চ প্ৰশংসা কৰে।
আজিৰ অনুষ্ঠানত নগাঁৱৰ বিভিন্ন অনুষ্ঠানে হিমাক উষ্ম আদৰণি আৰু সম্বৰ্ধনা জনোৱাক লৈ সম্বৰ্ধনা অনুষ্ঠানত হেতাওপৰা লাগে। অনুষ্ঠানত প্ৰশিক্ষক নিপন দাসেও ভাষণ প্ৰদান কৰি অসমত আৰু কেবাগৰাকী হিমা ওপজিব বুলিও আশা ব্যক্ত কৰে।
কেন্দ্ৰীয় মন্ত্ৰী ৰাজেন গোহাঁই, কেশব মহন্ত, বিধায়ক ৰূপক শৰ্মা আৰু শিলাদিত্য দেবে অংশগ্ৰহণ কৰা সভাখনত আদৰণী ভাষণ প্ৰদান কৰে নগাঁও জিলাৰ উপায়ুক্ত বিশ্বজিৎ পেগুৱে। অনুষ্ঠানটোত জিলা প্ৰশাসন আৰু ক্ৰীড়া সংস্থাই হিমাক এক লাখ টকাকৈ চেক আগবঢ়ায়।