SEBA ৰ কাণ্ডজ্ঞানহীনতা! গণিতত ৫৩ নম্বৰ পোৱা ছাত্ৰই ১০০ নম্বৰৰে লাভ কৰিলে অসমৰ ভিতৰত দশম স্থান

পুনৰ এবাৰ অসম মাধ্যমিক শিক্ষা পৰিষদ চমুকৈ ছেবাৰ গাফিলতিৰ কথা পোহৰলৈ আহিছে।
ছেবা কতৃপক্ষৰ কৰ্মজ্ঞানহীনতাৰ বাবে এজন ছাত্ৰই অসমৰ ভিতৰত স্থান লাভ কৰিও আনন্দ-স্ফুৰ্তিৰ পৰা বঞ্চিত হ’বলগীয়া হ’ল। আনকি সেই কৰ্মজ্ঞানহীনতাই হয়তো ভাল উচ্চ শিক্ষাৰ প্ৰতিষ্ঠানত নাম ভৰ্তিৰ ক্ষেত্ৰত কিছু সমস্যাৰ সৃষ্টি কৰিলে।

ঘটনাটো ছিপাঝাৰৰ। চিপাঝাৰ উচ্চতৰ মাধ্যমিক বিদ্যালয়ৰ ছাত্ৰ অবিনাশ চহৰীয়া। চিপাঝাৰৰ বদন চন্দ্ৰ চহৰীয়াৰ পুত্ৰ অবিনাশ চহৰীয়াই প্ৰথমে গণিত বিষয়ত বাদ কৰি আটাইকেইটা বিষয়তে লেটাৰ মাৰ্ক লাভ কৰিছিল। কিন্তু গণিতত মাত্ৰ ৫৩ নম্বৰ পোৱা বুলিহে দেখুওৱা হৈছিল।

কিন্তু ছাত্ৰগৰাকীৰ পিতৃ-মাতৃৰ লগতে বিদ্যালয়খনৰ শিক্ষক-শিক্ষয়িত্ৰীৰ সন্দেহ হোৱাত গণিত বিষয়ৰ বহীখন পুনৰীক্ষণ কৰাৰ বাবে মন মেলে।

তাৰ পাছতে ওলাই পৰিল জোলোঙাৰ মেকুৰী। ৫৩ নহয় গণিতত ১০০ ৰ ভিতৰত ১০০ নম্বৰেই লাভ কৰিছিল অবিনাশ চহৰীয়াই।

অবিনাশে অসমীয়াত ৯২, ইংৰাজীত ১০০, সাধাৰণ গণিতত ১০০, সাধাৰণ বিজ্ঞানত ১০০, সমাজ বিজ্ঞানত ৯৬ আৰু উচ্চ গণিতত ১০০ নম্বৰ লাভ কৰে। তেওঁ মুঠ ৫৮৮ নম্বৰ লাভ কৰে যিটো নম্বৰ ৰাজ্যৰ ভিতৰত দশম স্থান লাভ কৰোতাজনে পাইছিল। অৰ্থাৎ অবিনাশে দায়িত্বহীন ছেবাৰ বাবেই স্থান লাভ কৰিব নোৱাৰিলে।

অৱশেষত ১৪ জুলাইৰ দিনা ছেবা কৰ্তৃপক্ষৰ পৰা দশম স্থান পোৱা বুলি প্ৰমাণ পত্ৰ দিয়ে।

পূৰ্বেও ছেবাৰ এনে কৰ্মজ্ঞানহীনতাৰ ঘটনা বহুকেইটা ঘটি আহিছিল, এয়াই প্ৰথম নহয়।