ৰাজস্থানৰ ৰেড জ’নৰ পৰা অসমলৈ বাছেৰে আহি আছে ছাত্ৰ-ছাত্ৰীৰ এটা বৃহৎ দল; ৰখা হ’ব কোৱাৰিণ্টাইনত

ৰাজস্থানৰ কোটাত অধ্যয়তৰত অসমৰ ছাত্ৰ-ছাত্ৰীৰ এটা দল অসম চৰকাৰৰ সহযোগত অসমলৈ আহি আছে।

কামৰূপ মহানগৰ আৰক্ষীৰ সহকাৰী আৰক্ষী অধীক্ষক পণজিৎ‌ দুৱাৰৰ নেতৃত্বত যোৱা এটা আৰক্ষীৰ দলে ৰাজস্থানৰ পৰা অসমলৈ অসমৰ শিক্ষাৰ্থী দলটোক লৈ আহি আছে।

মুঠ ৩৯১ গৰাকী ছাত্ৰ-ছাত্ৰীক ১৮ খন বিশেষ বাছৰে অসমলৈ লৈ আহি থকা হৈছে বুলি মন্ত্ৰী হিমন্ত বিশ্ব শৰ্মাই সংবাদমেলত জানিবলৈ দিয়ে। ছাত্ৰ-ছাত্ৰীসকলৰ বেছিভাগৰে বয়স ১৮ বছৰতকৈ কম হ’ব বুলি মন্ত্ৰী গৰাকীয়ে লগতে জনায়।

অসমৰ শিক্ষাৰ্থী সকলক লৈ আহি থকা বাছ কেইখনৰ এই যাত্রা নিৰীক্ষণ কৰি আছে আই পি এছ বিষয়া তথা বৰ্তমান ৰাজ্যৰ ক’ৰ’না কণ্ট্ৰলৰ তত্বাৱধায়ক আনন্দ প্ৰকাশ তিৱাৰীয়ে।

অৱশ্যে, বাছৰ ভাড়া ছাত্ৰ-ছাত্ৰীসকলৰ অভিভাৱকে বহন কৰা বুলিও মন্ত্ৰীগৰাকীয়ে সংবাদমেলত জনায়। প্ৰতিগৰাকী ছাত্ৰ-ছাত্ৰীয়ে ৭০০০ টকাকৈ বাছৰ ভাড়া বহন কৰিছে বুলি হিমন্ত বিশ্ব শৰ্মাই সংবাদ মেলত উল্লেখ কৰি অসম চৰকাৰে বিভিন্ন ৰাজ্যৰ মাজেৰে পাৰ হৈ আহিবলগীয়া যাৱতীয় অনুমতিৰ ক্ষেত্ৰতহে সহায় কৰিছে বুলি জনায়।

যাত্ৰা বাটত উত্তৰ প্ৰদেশত যোগী চৰকাৰে দলটোক নিশা থকাৰ ব্যৱস্থা কৰি দিয়াৰ বাবেও হিমন্ত বিশ্ব শৰ্মাই উত্তৰপ্ৰদেশ চৰকাৰক ধন্যবাদ জ্ঞাপন কৰে।

ছাত্ৰ-ছাত্ৰীৰ দলটো অহা ২৬ এপ্ৰিলৰ পুৱা ৫:৩০ বজাত গুৱাহাটীত উপস্থিত হ’ব বুলি তেওঁ সংবাদমেলত জনায়।

ৰাজস্থানৰ ৰেড জ’নৰ পৰা অহা বাবে ছাত্ৰ-ছাত্ৰীৰ দলটোক পোনে পোনে ১৪ দিনৰ বাবে কোৱাৰিন্টাইন কৰিব বুলি মন্ত্ৰীগৰাকীয়ে সংবাদমেলত উল্লেখ কৰে।ছাত্ৰ-ছাত্ৰীসকলক আনিবৰ বাবে যোৱা ৮ জনীয়া আৰক্ষীৰ দলটোকো কোৱাৰিন্টাইনত ৰখা হ’ব বুলি তেওঁ কয়।