চাহ শ্ৰমিকক মাটিৰ পট্টা প্ৰদানৰ প্ৰক্ৰিয়াক লৈ উদ্বিগ্নতা: ভূমি হস্তান্তৰ নীতি স্পষ্ট কৰাৰ দাবী টি এছ’চিয়েশ্যন অৱ ইণ্ডিয়াৰ
অসমৰ চাহ বাগিচা অঞ্চলত শ্ৰমিকসকলক ভূমি হস্তান্তৰ কৰা বা পট্টা প্ৰদান কৰাৰ যি চৰকাৰী প্ৰক্ৰিয়া আৰম্ভ হৈছে, তাক লৈ এক নতুন চৰ্চাৰ সূত্ৰপাত হৈছে। চাহ শ্ৰমিকসকলৰ ভূমিৰ অধিকাৰ তথা এই হস্তান্তৰ নীতিৰ স্পষ্টীকৰণ বিচাৰি ৰাজ্য চৰকাৰলৈ আহ্বান জনাইছে টি এছ‘চিয়েশ্যন অৱ ইণ্ডিয়া (TAI) চমুকৈ ‘টি এ আই‘য়ে। দেওবাৰে সন্থাই প্ৰকাশ কৰা বিবৃতি অনুসৰি, বাগিচাৰ মাটি শ্ৰমিকক হস্তান্তৰ কৰাৰ ক্ষেত্ৰত থকা নীতি-নিয়মসমূহৰ কিছু অস্পষ্টতাই বাগিচা কৰ্তৃপক্ষ আৰু শ্ৰমিক উভয়ৰ মাজতে বিভ্ৰান্তিৰ সৃষ্টি কৰিব পাৰে। সেয়েহে, বাগিচা এলেকাত এক সুস্থিৰ পৰিৱেশ বৰ্তাই ৰাখিবলৈ চৰকাৰৰ তৰফৰ পৰা এক নিৰ্দিষ্ট আৰু স্পষ্ট নিৰ্দেশনাৰ প্ৰয়োজন বুলি সন্থাই দাবী উত্থাপন কৰিছে।
উল্লেখ্য যে, ৰাজ্য চৰকাৰে শেহতীয়াকৈ চাহ শ্ৰমিকসকলৰ দীৰ্ঘদিনীয়া দাবীৰ প্ৰতি সঁহাৰি জনাই তেওঁলোকে বসবাস কৰি থকা ভূমিৰ পট্টা প্ৰদান কৰাৰ এক গুৰুত্বপূৰ্ণ সিদ্ধান্ত গ্ৰহণ কৰিছে। কিন্তু চাহ বাগিচাৰ মাটি সাধাৰণতে চৰকাৰী লীজ বা বিশেষ আবণ্টনৰ অধীনত থাকে, যাৰ বাবে এই ভূমি পোনপটীয়াকৈ শ্ৰমিকৰ নামলৈ হস্তান্তৰ কৰাৰ আইনী আৰু প্ৰশাসনিক প্ৰক্ৰিয়াটোক লৈ চাহ মালিক সন্থাসমূহৰ মাজত কেতবোৰ প্ৰশ্নৰ উদয় হৈছে। টি এ আই-এ স্পষ্ট কৰি দিছে যে তেওঁলোক শ্ৰমিকৰ কল্যাণ বা ভূমি প্ৰদানৰ বিৰোধী নহয়, বৰঞ্চ এই সমগ্ৰ প্ৰক্ৰিয়াটো যাতে বাগিচাৰ ভৱিষ্যতৰ সম্প্ৰসাৰণ আৰু উৎপাদনত কোনো বিৰূপ প্ৰভাৱ নপৰাকৈ সুচাৰুৰূপে সম্পন্ন হয়, সেয়াহে নিশ্চিত কৰিব বিচাৰে।
সন্থাৰ সূত্ৰই প্ৰকাশ কৰা মতে, শ্ৰমিকসকলক ভূমি প্ৰদান কৰোঁতে বাগিচাৰ চাহ খেতি কৰা মাটি আৰু আৱাসিক এলেকাৰ মাজত সঠিক সীমা নিৰ্ধাৰণ হোৱাটো অতি জৰুৰী। নীতিৰ স্পষ্টীকৰণ নহ‘লে ভৱিষ্যতে ভূমি বেদখল বা মালিকীস্বত্বক লৈ আইনী জটিলতাৰ সৃষ্টি হোৱাৰ আশংকা থাকে। সেয়েহে, টি এছ‘চিয়েশ্যন অৱ ইণ্ডিয়াই অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগ তথা শ্ৰম বিভাগক এই সন্দৰ্ভত এক বিস্তৃত কাৰ্যপ্ৰণালী নিৰ্দেশনাৱলী (Standard Operating Procedure) জাৰি কৰিবলৈ অনুৰোধ জনাইছে। এনে নিৰ্দেশনাৱলীয়ে চাহ বাগিচাৰ পৰিচালনা সমিতি আৰু শ্ৰমিকসকলৰ মাজত থকা পাৰস্পৰিক সম্পৰ্ক অধিক সুদৃঢ় কৰাত সহায় কৰিব বুলিও সন্থাই মত প্ৰকাশ কৰিছে।
অসমৰ অৰ্থনীতিত চাহ উদ্যোগৰ এক গুৰুত্বপূৰ্ণ ভূমিকা আছে আৰু লাখ লাখ শ্ৰমিকৰ জীৱিকা ইয়াৰ ওপৰতেই নিৰ্ভৰশীল। চৰকাৰৰ ভূমি পট্টা প্ৰদানৰ পদক্ষেপে শ্ৰমিকসকলৰ জীৱনলৈ এক ইতিবাচক পৰিৱৰ্তন আনিব বুলি আশা কৰা হৈছে যদিও, একে সময়তে উদ্যোগটোৰ বহনক্ষমতাৰ প্ৰতিও সমানে গুৰুত্ব প্ৰদান কৰিবলগীয়া হৈছে। আগন্তুক সময়ত ৰাজ্য চৰকাৰে চাহ বাগিচাৰ মালিক পক্ষ আৰু শ্ৰমিক সংগঠনসমূহৰ সৈতে আলোচনা মৰ্মে এই ভূমি হস্তান্তৰ নীতি কিদৰে কাৰ্যকৰী কৰে, সেয়া সকলোৰে বাবে লক্ষণীয় হ‘ব।