অসমৰ বিদ্যালয়ত শিক্ষাৰ মাধ্যম হিচাপে প্ৰচলিত হ’ব ‘সাওঁতালী’ ভাষা

মুখ্যমন্ত্ৰী হিমন্ত বিশ্ব শৰ্মাৰ অধ্যক্ষতাত অনুষ্ঠিত হোৱা অসম কেবিনেটে অসমত সাওঁতালী ভাষাৰ বাবে OL CIKI লিপি স্বীকৃতি দিয়াৰ সিদ্ধান্ত গ্ৰহণ কৰিছে।

শুকুৰবাৰে গুৱাহাটীত কেবিনেটৰ সিদ্ধান্তৰ বিষয়ে অৱগত কৰি ৰাজ্যৰ শিক্ষামন্ত্ৰী ৰাণোজ পেগুৱে কয় যে, “শিক্ষাৰ মাধ্যম হিচাপে সাওঁতালী ভাষাৰ প্ৰৱৰ্তনে সাওঁতাল জনগোষ্ঠীক প্ৰাক প্ৰাথমিক আৰু প্ৰাথমিক শিক্ষা প্ৰদানত সুবিধা প্ৰদান কৰিব। সংবিধানৰ অষ্টম সূচীত অন্তৰ্ভুক্ত এই ভাষাটো অসমৰ লগতে কেইবাখনো ৰাজ্যৰ কথিত ভাষা”

কেবিনেটৰ এই সিদ্ধান্তক আদৰণি জনাই অল সাওঁতাল ষ্টুডেণ্টছ ইউনিয়নে ৰাজ্যিক কেবিনেটক প্ৰশংসা কৰে।

সদৌ সাওঁতাল ছাত্ৰ সন্থাৰ সভাপতি মিণ্টু হেমব্ৰমে কয়, “প্ৰাথমিক বিদ্যালয়ত সাওঁতালী ভাষাৰ প্ৰৱৰ্তন আমাৰ দীৰ্ঘদিনীয়া দাবী আছিল। সদৌ অসম সাওঁতাল সাহিত্য সভাৰ বাহিৰেও আমি ২০০৫ চনৰ পৰা এই দাবী উত্থাপন কৰি আহিছো। ৰাজ্যৰ মন্ত্ৰীসভাৰ এই সিদ্ধান্তক মই আদৰণি জনাইছোঁ। অসমীয়া ভাষাৰ দৰেই সাওঁতালী ভাষাকো আগুৱাই নিয়াৰ বাবে অসম চৰকাৰে সকলো পৰ্যাপ্ত ব্যৱস্থা গ্ৰহণ কৰিব বুলি আশা কৰিলোঁ। চৰকাৰৰ এই সিদ্ধান্তত অসমৰ সাওঁতাল জনগোষ্ঠী উল্লাসিত হৈ পৰিছে।”