বিজয় হাজাৰে ট্ৰফীত আপেক্ষিকভাৱে দুৰ্বল অৰুণাচলৰ বিপক্ষে সহজ জয় অসমৰ
অসম ক্ৰিকেট দল
ডেৰাডুনত চলি থকা বিজয় হাজাৰে ট্ৰফী ক্ৰিকেটৰ প্লেট গ্ৰুপৰ এখন খেলত দেওবাৰে অসমে আপেক্ষিকভাৱে দুৰ্বল অৰুণাচলৰ বিৰুদ্ধে সহজ বিজয় সাব্যস্ত কৰিছে।
অৰুণাচলে খেলখনত প্ৰথমে বেট ধৰি ৪০ অভাৰত আটাইকেইটা উইকেট হেৰুৱাই মাত্ৰ ১১২ ৰাণহে কৰিবলৈ সক্ষম হয়।
অৰুণাচলৰ হৈ নীলম অ’বিয়ে সৰ্বাধিক ২৯ ৰাণ কৰে।
আনহাতে, অসমৰ হৈ বলিঙত ৰিয়ান পৰাগে ৪ টা আৰু প্ৰীতম দাসে ৩ টা উইকেট দখল কৰে।
অৰুণাচল প্ৰদেশৰ ১১২ ৰাণৰ প্ৰত্যুত্তৰত অসমে বেট ধৰি ১৪.৩ অভাৰত এটাও উইকেট নেহেৰুৱাকৈ ১১৬ ৰাণ কৰি সহজে নিৰ্ধাৰিত লক্ষ্যত উপনীত হয়।
অসমৰহৈ দুই অপেনাৰ পল্লৱ কুমাৰ দাসে ৭৬ ৰাণ আৰু স্বৰূপম কায়স্তই ৩৬ ৰাণ সংগ্ৰহ কৰি অপৰাজিত হৈ থাকে।
অৰুণাচলৰ বিপক্ষে বিজয়ৰ পাছত অসমে প্ৰতিযোগিতাখনত ৭ খন খেলৰ ৫ খনত জয় আৰু ২ খনত পৰাজয়েৰে মুঠ ২০ পইণ্ট সংগ্ৰহ কৰি পইণ্ট টেবলৰ তৃতীয় স্থানত আছে।