মহানগৰীত চাঞ্চল্য! ভাড়াঘৰৰ কোঠাত উদ্ধাৰ ধেমাজিৰ যুৱতীৰ মৃতদেহ
গুৱাহাটী মহানগৰীৰ হেঙেৰাবাৰী অঞ্চলত উদ্ধাৰ হৈছে এগৰাকী মহিলাৰ মৃতদেহ। হেঙেৰাবাৰীস্থিত অমৃত উদ্যানৰ সমীপৱৰ্তী ভাড়াঘৰত উদ্ধাৰ হৈছে যুৱতীগৰাকীৰ মৃতদেহ।
নিহত মহিলাগৰাকীৰ নাম অনুস্কা শইকীয়া বুলি চিনাক্ত কৰা গৈছে। কৰ্মসূত্ৰে গুৱাহাটীত থকা যুৱতীগৰাকী ধেমাজিৰ বুলি জানিব পৰা গৈছে।
আৰক্ষীয়ে সদৰী কৰা মতে, যুৱতীগৰাকী এখন পাৰ্লাৰত বিউটিচিয়ান হিচাপে কাম কৰিছিল আৰু বিগত এবছৰ ধৰি গুৱাহাটীত বাস কৰিছিল।
মহিলাগৰাকীৰ মৃতদেহ কোঠাৰ ভিতৰত আৱিষ্কাৰৰ পিছতে দিছপুৰ আৰক্ষীক খবৰ দিয়া হয় আৰু আৰক্ষীৰ এটা দল ঘটনাস্থলীত উপস্থিত হৈ মৃতদেহ উদ্ধাৰ কৰে।
ফৰেনছিক বিশেষজ্ঞৰ দলো ঘটনাস্থলীত উপস্থিত হৈ ঘটনা সন্দৰ্ভত প্ৰমাণ সংগ্ৰহ কৰে। যুৱতীগৰাকীৰ মৃত্যুৰ কাৰণ এইপৰ্যন্ত নিৰ্ণয় কৰিব পৰা নাই।
যুৱতীগৰাকীয়ে আত্মহত্যা কৰিছে নে হত্যাৰ বলি হৈছে, তদন্তৰ পিছতহে জানিব পৰা যাব বুলি উল্লেখ কৰে এগৰাকী আৰক্ষী বিষয়াই।