ডিব্ৰুগড়ত মুকলি অসমৰ দ্বিতীয়খন চৰকাৰী দন্ত চিকিৎসা মহাবিদ্যালয়

ডিব্ৰুগড়ৰ অসম চিকিৎসা মহাবিদ্যালয় আৰু চিকিৎসালয় চৌহদত মঙলবাৰে আৰম্ভ হ’ল ৰাজ্যৰ দ্বিতীয়খন চৰকাৰী দন্ত চিকিৎসা মহাবিদ্যালয়।

সদ্যহতে গ্ৰেহাম বজাৰৰ এটা চৌহদ আৰু অসম চিকিৎসা মহাবিদ্যালয়  চৌহদত দন্ত মহাবিদ্যালয়খনৰ পাঠদান চলিব বুলি জনাই এগৰাকী বিষয়াই কয় যে পৰৱৰ্তী সময়ত এ এম চি এইচ্চ চৌহদত নিৰ্মাণ হ’ব লগা দন্ত মহাবিদ্যালয়ৰ ভৱনলৈ তাক স্থানান্তৰিত কৰা হ’ব।

মহাবিদ্যালয়খনত ভাৰতীয় দন্ত কাউন্সিলে মুঠ ৫০খন আসনৰ অনুমোদন জনাইছে।

মহাবিদ্যালয়খনত নামভৰ্তি কৰা অসমৰ বিভিন্ন প্ৰান্তৰ ৪৫গৰাকী ছাত্ৰ-ছাত্ৰীয়ে উদ্বোধনৰ দিনা অ’ৰিয়েন্তে’শ্বন কাৰ্য্যসূচীত ভাগ লয়।

অধ্যক্ষ ডা০ হিৰণ্য কুমাৰ গোস্বামী, উপাধ্যক্ষ ডা০ ৰুপক কুমাৰ গগৈ, অধীক্ষক ডা০ ইন্দ্ৰ কুমাৰ চুতীয়া, শৰীৰ তত্ত্ব বিভাগৰ সহযোগী অধ্যাপক ড০ গিৰিৰাজ কুচ্ৰেৰ লগতে মহাবিদ্যালয়খনৰ সকলো শিক্ষকেই অনুষ্ঠানটোত উপস্থিত থাকে।