শিৱসাগৰৰ শিৱদ’লৰ ব্ৰাহ্মণৰ ওচৰত আৰ্শীবাদ ল’লে জুবিন গাৰ্গে

অহা ৬ ছেপ্তেম্বৰত মুক্তি পাবলগীয়া কাঞ্চনজংঘাৰ প্ৰচাৰৰ বাবে যোৱা তিনিদিন ধৰি শিৱসাগৰত আছে জুবিন গাৰ্গ। শিৱসাগৰৰ বিভিন্ন স্থানত ছবিখনৰ প্ৰচাৰ চলাই আছে জুবিনৰ লগতে ছবিখনৰ বহু কেইগৰাকী অভিনেতা অভিনেত্ৰীয়ে।

কাঞ্চনজংঘাৰ সাফল্য বিচাৰি আজি শিৱসাগৰৰ ঐতিহাসিক শিৱদ’লত পূজা কৰিলে জুবিন গাৰ্গ আৰু কাঞ্চনজংঘাৰ টীমে। শিৱদ’লৰ কুণ্ডত গাখীৰ ঢালি শিৱবাবাৰ আৰ্শীবাদ লয় জুবিনে।

উল্লেখযোগ্য যে কিছুদিন পূৰ্বে ব্ৰাহ্মণ সম্প্ৰদায় আৰু লগোনক লৈ জুবিনে কৰা মন্তব্যত জাঙুৰ খাই উঠিছিল ব্ৰাহ্মণ সমাজ। অৱশ্যে পৰৱৰ্তী সময়ত জুবিনে ব্ৰাহ্মণ সমাজৰ ওচৰত লিখিতভাৱে ক্ষমা খোজাত বিতৰ্কৰ অন্ত পৰে।

ইয়াৰ পিছত আজি জুবিনে শিৱসাগৰৰ শিৱ দ’লত পূজা কৰি পূজাৰীৰ ওচৰত আৰ্শীবাদ লয়।

‘মই শিৱক ভাল পাওঁ। মোৰ ছবি মিচন চাইনাত শিৱ মন্ত্ৰ ব্যৱহাৰ কৰিছো, কাঞ্চনজংঘাতো হিমালয় মন্ত্ৰ ব্যৱহাৰ কৰিছো। শিৱ ট্ৰাইবেল ভগৱান আছিল। শিৱ এগৰাকী মিউজিচিয়ান আছিল, তেওঁ নৃত্যও কৰিছিল।’ জুবিনে কয়।

শিৱসাগৰৰ শিৱ মন্দিৰত পূজা কৰি বহুত ভাল লাগিল বুলি মন্তব্য কৰে জুবিনে লগতে কয় যে তেওঁৰ পৰৱৰ্তী ছবি শিৱসাগৰত বনাব।

অহা ৬ ছেপ্তেম্বৰত অসমৰ ছবিগৃহত মুক্তি পাব লগীয়া কাঞ্চনজংঘা চাবলৈ তেওঁ সকলোকে আহ্বান জনায়।