বিধান সভা নিৰ্বাচন : ৯৩ নং বোকাখাত বিধান সভা সমষ্টিত ১২ গৰাকী প্ৰাৰ্থীৰ মনোনয়ন পত্ৰ সংগ্ৰহ

আগন্তুক বিধান সভা নিৰ্বাচনত ৯৩ নং বোকাখাত বিধান সভা সমষ্টিত প্ৰতিদ্বন্দ্বিতা কৰা মানসেৰে বোকাখাতৰ নিৰ্বাচনী বিষয়াৰ কাৰ্যালয়ৰ পৰা মুঠ ১২ গৰাকী প্ৰাৰ্থীয়ে মনোনয়ন পত্ৰ সংগ্ৰহ কৰিছে৷

এই ১২ গৰাকী প্ৰাৰ্থীৰ ভিতৰত অসম গন পৰিষদ দলৰ সভাপতি অতুল বৰা, ভাৰতীয় জাতীয় কংগ্ৰেছৰ দাদু টায়ে,  মিনতি দলে,  হৰি প্ৰসাদ শইকীয়া,  তপন কৰ্মকাৰ আৰু জিতু শইকীয়া৷

নিৰ্দলীয় প্ৰাৰ্থী হিচাবে হেমন্ত দলৈ,  জিতেন গগৈ,  সূৰ্য কাকতী,  দুলাল বৰা আৰু প্ৰনৱ দলে মংগলবাৰে মনোনয় পত্ৰ সংগ্ৰহ কৰে৷

ইয়াৰ বিপৰীতে এন চি পি দলৰ হৈ মৃদুল শইকীয়াও বোকাখাতৰ নিৰ্বাচনীয় বিষয়াৰ কাৰ্যালয়ৰ পৰা মনোনয়ন পত্ৰ সংগ্ৰহ কৰিছে৷

উল্লেখ্য যে নিৰ্বাচন আয়োগে কৰা ঘোষণা মতে ৯৩ নং বোকাখাত বিধান সভা সমষ্টিত অহা ২৭ মাৰ্চত ভোটগ্ৰহণ অনুষ্ঠিত হ’ব৷

অসম বিধান সভাৰ ২৭ মাৰ্চত অনুষ্ঠিত হ’ব লগা প্ৰথম পৰ্যায়ৰ নিৰ্বাচনত ৯৩ নং-বোকাখাত বিধানসভা সমষ্টিৰ মুঠ ১৮৫ টা ভোটগ্রহণ কেন্দ্রত নিৰ্বাচন অনুষ্ঠিত হ’ব।

ইয়াৰে ৮ টা ভোটগ্রহণ কেন্দ্র নগৰাঞ্চলত আৰু ১৭৭ টা ভোটগ্ৰহণ কেন্দ্ৰ গ্রামাঞ্চলত আৱস্থিত। নিৰ্বাচনত সমষ্টিটোত ৩১ টা সহায়ক ভোটগ্রহণ কেন্দ্র স্থাপন কৰিছে প্ৰশাসনে৷

ইফালে বোকাখাত সমষ্টিত ১০ টা ভোটগ্ৰহণ কেন্দ্রক জটিল ভোটগ্ৰহণ কেন্দ্র বুলি চিনাক্ত কৰা হৈছে।

উল্লেখ্য যে বোকাখাত বিধানসভা সমষ্টিত মুঠ ভোটাৰৰ সংখ্যা হৈছে ১,৪৪,৩৬৩ গৰাকী৷ ইয়াৰে ৭২,৪২০ গৰাকী পুৰুষ ভোটাৰ আৰু ৭১,৯৪৩ গৰাকী মহিলা ভোটাৰ৷

সমষ্টিটোত ১৮ৰপৰা ১৯ বছৰ বয়সৰ ভোটাৰৰ সংখ্যা হৈছে ১৮৯৭ আৰু ৮০ বছৰ উৰ্ধৰ ভোটাৰৰ সংখ্যা হৈছে ১৩৫৬ গৰাকী৷ বিশেষভাবে সক্ষম ভোটাৰৰ সংখ্যা হৈছে মুঠ ৯৪২ গৰাকী। ইয়াৰে পুৰুষ ভাটাৰৰ সংখ্যা হৈছে 8৫৬ আৰু মহিলা ভোটাৰৰ সংখ্যা হৈছে ৪৮৬ গৰাকী৷

একেদৰে বোকাখাত বিধানসভা সমষ্টিত মুঠ ডি ভোটাৰৰ সংখ্যা হৈছে ২১২ গৰাকী। মুঠ চাৰ্ভিচ ভোটাৰ আছে ৩৫৩ জন।

১,৪৪,৩৬৩ গৰাকী ভোটাৰে অহা ২৭ মাৰ্চত নিজৰ ভোটাধিকাৰ সাৱ্যস্ত কৰি জন প্ৰতিনিধি নিৰ্বাচনৰ সুবিধা লাভ কৰিব৷