অসম বিজ্ঞান-প্ৰযুক্তি বিশ্ববিদ্যালয়ৰ অবিবেচক কাণ্ডত ক্ষুদ্ধ ছাত্ৰ ছাত্ৰীৰ অনিৰ্দিষ্টকালীন অৱস্থান ধৰ্মঘট

অসম বিজ্ঞান-প্ৰযুক্তি বিশ্ববিদ্যালয়ৰ অবিবেচক কাণ্ডত ক্ষুদ্ধ ছাত্ৰ ছাত্ৰীয়ে আজি পুৱাৰে পৰা অনিৰ্দিষ্টকালীন অৱস্থান ধৰ্মঘট কাৰ্য্যসূচী ৰূপায়ণ কৰে। বৰ্তমানো বিশ্ব-বিদ্যালয়ৰ সন্মুখত অৱস্থান ধৰ্মঘটৰ কাৰ্য্যসূচী ৰূপায়ণ কৰি আছে ছাত্ৰ-ছাত্ৰীসকলে।

বিশ্ববিদ্যালয়খনৰ ফাৰ্মাচিউটিকেলৰ পৰীক্ষা অনুষ্ঠিত নহয় বুলি কৈয়ো হঠাৎ অনুষ্ঠিত কৰাৰ জাননীত ক্ষুদ্ধিত হৈ পৰিছে বিভাগটোত অধ্যয়নৰতঃ ৪ শতাধিক ছাত্ৰ-ছাত্ৰী।

অহা ২১ ডিচেম্বৰৰ পৰা হঠাৎ পৰীক্ষা অনুষ্ঠিত কৰিবলৈ বিশ্ববিদ্যালয়খনে সিদ্ধান্ত লোৱাত অস্বস্তিত পৰা ছাত্ৰ-ছাত্ৰীসকলে এই সিদ্ধান্ত বাতিল নকৰা পৰ্য্যন্ত তেওঁলোকৰ প্ৰতিবাদ চলাই নিব বুলি উল্লেখ কৰিছে।

এই সন্দৰ্ভত বিশ্ববিদ্যালখনত অধ্যয়ণৰতঃ অনুৰাগ শৰ্মা নামৰ ছাত্ৰজনে কয় ‘আছাম চাইন্স এণ্ড টেকন’ল’জিৰ ফালৰ পৰা যোৱা ১০ জুলাইত এখন জাননী আহিছিল যে যিহেতু কোভিড পৰিস্থিতি চলি আছে গতিকে সকলোকে চেমিষ্টাৰসমূহৰ পৰা উত্তীৰ্ণ কৰাই দিয়া হ’ব। পূৰ্বৰ চেমিষ্টাৰৰ পৰা ৫০ শতাংশ নম্বৰ লোৱা হ’ব বুলি কোৱা হৈছিল। আৰু ৫০ শতাংশ চলি থকা বৰ্ষৰ পৰা লোৱা হ’ব।

‘কিন্তু আগষ্ট জাননী আহিল যে নৱেম্বৰ মাহত পৰীক্ষা অনুষ্ঠিত হ’ব। কিন্তু নৱেম্বৰত পৰীক্ষা অনুষ্ঠিত নহ’ল। কিন্তু হঠাৎ ৬ ডিচেম্বৰত এক জাননী আহিল যে ২১ ডিচেম্বৰৰ পৰা পৰীক্ষা অনুষ্ঠিত হ’ব।‘ পৰীক্ষা অনুষ্ঠিত কৰাৰ ১৫ দিন পূৰ্বে কিয় জাননী জাৰি কৰা হ’ল বুলি প্ৰশ্ন কৰি শৰ্মাই এইদৰে কয়।

তেওঁ আৰু কয় ‘এতিয়া ছাত্ৰ-ছাত্ৰীসকলৰ নতুন চেমিষ্টাৰ চলি আছে কিয়নো তেওঁলোকক উত্তীৰ্ণ কৰি দিয়া হৈছিল বুলি কোৱা হৈছিল। কিন্তু পূৰ্বৰ চেমিষ্টাৰৰ কোনো পাঠ্যক্ৰম ছাত্ৰ-ছাত্ৰীসকলে অধ্যয়ন কৰা নাই। সেয়েহে নিশ্চয়কৈ আমি পৰীক্ষাত অৱতীৰ্ণ হোৱাত যথেষ্ট অসুবিধাৰ সন্মুখীন হৈছো।‘

আনহাতে, চিন্ময় কৌশিক নামৰ আন এগৰাকী ছাত্ৰই এই সন্দৰ্ভত কয় ‘যিহেতু কোভিডৰ ভয়াবহতাৰ বাবে হোষ্টেলসমূহ বন্ধ আছিল আৰু প্ৰায়সমূহ ছাত্ৰ-ছাত্ৰীয়ে হোষ্টেলত থাকি পঢ়া-শুনা কৰে। যোৱা ১৫ ডিচেম্বৰৰ পৰাহে হোষ্টেল মুকলি হৈছে গতিকে ৫ দিনৰ ভিতৰত কেনেকৈ আমাৰ পাঠ্যক্ৰম পঢ়ি সম্পূৰ্ণ কৰিম?’

সেয়েহে অনতি পলমে ছাত্ৰ-ছাত্ৰীৰ ভৱিষ্যতৰ প্ৰতি চিন্তা কৰি এই সিদ্ধান্ত বাতিল কৰি পুনৰ ছাত্ৰ-ছাত্ৰীৰ ভৱিষ্যতৰ স্বাৰ্থত সিদ্ধান্ত গ্ৰহণৰ বাবে দাবী তোলে।

তেওঁলোকৰ দাবী মানি নোলোৱা পৰ্য্যন্ত অৱস্থান ধৰ্মঘটৰ কাৰ্য্যসূচী ৰূপায়ণ কৰি যোৱাৰ হুংকাৰ দিয়ে ৪ শতাধিক ছাত্ৰ-ছাত্ৰীয়ে।