ভিৰ চম্ভালিব নোৱাৰি ভাঙি পৰিল জৈন নিৰ্বাণ উৎসৱৰ মঞ্চ; ৫ জনৰ মৃত্যু, আহত প্ৰায় ৪০জন

উত্তৰ প্ৰদেশৰ বাঘপতৰ বাগৌৰ অঞ্চলত সংঘটিত হয় এক ভয়ংকৰ দুৰ্ঘটনা। মঙলবাৰে জৈন নিৰ্বাণ উৎসৱৰ সময়ত জনসমাগমৰ বাবে অনুষ্ঠানটোৰ অস্থায়ী মঞ্চ ভাঙি পৰে।

জানিব পৰা মতে, এই ভয়াবহ দুৰ্ঘটনাত ইতিমধ্যে ৫ জন লোকৰ মৃত্যু হৈছে। এই ঘটনাত মহিলা আৰু শিশুকে ধৰি কমেও ৪০ জন লোক আহত হয়।

বাতৰি অনুসৰি, নিৰ্বাণ উৎসৱৰ মাজতে চলি আছিল লাড়ু নিবেদন অনুষ্ঠান। তাত সহস্ৰাধিক অনুৰাগী উপস্থিত হৈছিল। এই অনুষ্ঠানৰ বাবে বাঁহ আৰু কাঠ ব্যৱহাৰ কৰি এখন অস্থায়ী মঞ্চ নিৰ্মাণ কৰা হৈছিল।

ভক্তসকলে জৈন ঋষিৰ সান্নিধ্যত ভগৱান আদিনাথক লাড্ডু আগবঢ়াবলৈ আহিছিল। ভিৰৰ ওজন চম্ভালিব নোৱাৰি মঞ্চখন হঠাতে ভাঙি পৰিল। ধ্বংসাৱশেষৰ তলত আবদ্ধ হৈ পৰে বহু লোক।

আৰক্ষী সূত্ৰৰ মতে, দুৰ্ঘটনাৰ খবৰ পোৱাৰ লগে লগে জিলা দণ্ডাধীশকে ধৰি জ্যেষ্ঠ আৰক্ষী বিষয়াই ক্ষীপ্ৰতাৰে সেই স্থানত উপস্থিত হৈ পৰিস্থিতি নিয়ন্ত্ৰণ কৰে। লগে লগে আহতসকলক চিকিৎসালয়লৈ লৈ যোৱা হয়।

ইতিমধ্যে ঘটনাস্থলীত এখন এম্বুলেন্স আছিল বুলি জিলা প্ৰশাসনে অৱগত কৰিছে। যাৰ বাবে দ্ৰুতভাৱে চিকিৎসা প্ৰদান কৰা সম্ভৱ হৈছে।

বাঘপত জিলা দণ্ডাধীশ অস্বীতা লালে কয় যে, “প্ৰায় ৩০ বছৰ ধৰি চলি আহিছে এই বিশেষ অনুষ্ঠান। এই দুৰ্ঘটনাত ৫ জন লোকৰ মৃত্যু হৈছে আৰু  প্ৰায় ৪০ জন লোক আহত হয়। ইয়াৰে ২০ জনক প্ৰাথমিক চিকিৎসাৰ অন্তত মুকলি কৰি দিয়া হৈছে, বাকীসকল চিকিৎসাধীন হৈ আছে।”

উত্তৰ প্ৰদেশৰ মুখ্যমন্ত্ৰী যোগী আদিত্যনাথে ঘটনাত আহতসকলৰ আশু আৰোগ্য কামনা কৰিছে।