১২ লাখ টকাত নিলাম মোদীক অসমে দিয়া উপহাৰ

মাজুলীৰ এখন শৰাইকে ধৰি প্ৰধান মন্ত্ৰী হিচাপে নৰেন্দ্ৰ মোদীক সন্মান আৰু আদৰৰ চিনৰূপে বিভিন্নজনে দিয়া উপহাৰসমূহ শনিবাৰে নিলাম হৈছে।

১৫ দিন ধৰি মুকলি ৰখা এই নিলামত ১২ লাখ টকাৰ দ্বিতীয় সৰ্ববৃহৎ মূল্যত বিক্ৰী হৈছে অসমৰ শৰাইখন। সৰ্বাধিক ১৩ লাখত বিক্ৰী হৈছে এটা কাঠৰ অশোক স্তম্ভ।

প্ৰধান মন্ত্ৰীৰ ১৮০০ বিধ সামগ্ৰী নিলামযোগে পোৱা সমুদায় ধন “নমামি গংগে” শীৰ্ষক গংগা পৰিষ্কৰণ কাৰ্য্যসূচীত খৰচ হ’ব।

গংগাক পবিত্ৰ আৰু ৰাষ্ট্ৰীয় নদীৰূপে ঘোষণা কৰি মোদী চৰকাৰে ২০১৪ চনৰ পৰা এই “নমামি গংগে” প্ৰকল্প আৰম্ভ কৰিছিল। কিন্তু ’১৪ৰ পৰৱৰ্তী প্ৰত্যেক কেন্দ্ৰীয় বাজেটে প্ৰকল্পটোৰ নামত ঘোষিত ধনৰাশিৰ অতি নগণ্য পৰিমাণহে মোকলাই দি আহিছে।

২০১৫ চনৰ বাজেটত ঘোষিত ধন আছিল ২০৫৩ কোটি টকা কিন্তু মোকলাই দিয়া হ’ল মাত্ৰ ৮.৩৮ কোটি টকা।

সেইদৰে ’১৬, ’১৭ আৰু ’১৮ত ঘোষিত হৈছিল ১৬৭৫, ১৬৫০ আৰু ৩০২৩ কোটি টকা কিন্তু মোকলাই দিয়া হ’ল ক্ৰমে মাত্ৰ ৬৩.৪৫, ৩৬.৫২ আৰু ৫৩.৭৫ কোটি টকা, এই সমূহ তথ্য দ হিন্দু-ৰ।

ব্ৰহ্মপুত্ৰক লৈ নমামি কেন্দ্ৰীয় চৰকাৰে “নমামি গংগা”ৰ দৰে আঁচনি গ্ৰহণ কৰা নাই যদিও সোণোৱাল চৰকাৰে “নমামি ব্ৰহ্মপুত্ৰ” শীৰ্ষক এক কাৰ্য্যসূচী আয়োজন কৰিছিল।

কিন্তু কেৱল পূজা-পাতলৰ “আনুষ্ঠানিকতা”ৰূপে ৰাজ্যজুৰি যথেষ্ট সমালোচনা হোৱা অনুষ্ঠানটো পুনৰ আয়োজন কৰা দেখা নগ’ল।