ধৰ্ষণ, নিৰ্যাতনৰ অপৰাধত পাঁচ বছৰতকৈও অধিক কালৰ কাৰাদণ্ড অষ্ট্ৰেলিয়াৰ ৰাজনীতিবিদক
শুকুৰবাৰে (৩১ অক্টোবৰ, ২০২৫) ধৰ্ষণ আৰু যৌন নিৰ্যাতনৰ অভিযোগত দেশখনৰ এগৰাকী প্ৰাক্তন সাংসদক অষ্ট্ৰেলিয়াৰ এগৰাকী ন্যায়াধীশে পাঁচ বছৰতকৈও অধিক কালৰ বাবে কাৰাদণ্ড বিহে।
নিউ চাউথ ৱেলছৰ সোঁপন্থী ৰাজনীতিবিদ গেৰেথ ৱাৰ্ডক ২০১৩ চনৰ পৰা ২০১৫ চনৰ ভিতৰত ১৮ আৰু ২৪ বছৰীয়া দুজন ব্যক্তিক নিৰ্যাতন চলোৱাৰ অভিযোগত জুলাই মাহত দোষী সাব্যস্ত কৰা হৈছিল।
তথাপিও ৪৪ বছৰীয়া গেৰেথে তেতিয়ালৈকে পদত্যাগ কৰিবলৈ অস্বীকাৰ কৰিছিল। কিন্তু দুসপ্তাহৰ পিছত জাতীয় সংসদৰ সদস্যসকলে তেওঁক অপসাৰণ কৰিবলৈ ভোট দিবলৈ ওলোৱাত বাধ্য হয়।
ছিডনীৰ পাৰামাটা জিলা আদালতত ন্যায়াধীশ কাৰা শ্বেডে তেওঁক এই অপৰাধৰ বাবে সামগ্ৰিকভাৱে পাঁচ বছৰ আৰু ৯ মাহৰ শাস্তি প্ৰদান কৰে। ইয়াৰ ভিতৰত আছিল এটা ধৰ্ষণৰ গোচৰ আৰু তিনিটা অশালীন নিৰ্যাতন।
আদালতৰ নথি-পত্ৰত দেখা গৈছে যে মহিলা ন্যায়াধীশগৰাকীয়ে তেওঁ তিনি বছৰ ৯ মাহৰ বাবে পেৰ’লৰ বাবে যোগ্য নহ’ব বুলি ৰায় দিছে।
দ্য অষ্ট্ৰেলিয়ান নিউজপেপাৰৰ মতে, ন্যায়াধীশগৰাকীয়ে কয় যে ৰাজনীতিবিদজনে নিজৰ প্ৰথম ভুক্তভোগীক নিৰ্যাতনত “ইচ্ছাকৃত আৰু হিংস্ৰতা” আছিল আৰু দ্বিতীয়জন ভুক্তভোগীৰ সুবিধা লৈছিল যেতিয়া তেওঁ নিচাগ্ৰস্ত আৰু “দুৰ্বল” আছিল।
নিজৰ এই শাস্তিৰ বিৰুদ্ধে গেৰেথ ৱাৰ্ডে আপীল কৰাৰ সম্ভাৱনা আছে।