জংঘলত ছুটকেছৰ ভিতৰত উদ্ধাৰ বহুচৰ্চিত ইনফ্লুৱেঞ্চাৰৰ মৃতদেহ

পাঁচ দিন ধৰি নিৰুদ্দেশ হৈ থকা ইউৰোপৰ বিউটি ইনফ্লুৱেঞ্চাৰ ষ্টেফানী পাইপাৰ (৩১)ৰ মৃতদেহ উদ্ধাৰ কৰিছে আৰক্ষীয়ে। অষ্ট্ৰিয়াৰ মহিলাগৰাকীক হত্যা কৰে তেওঁৰ প্ৰাক্তন প্ৰেমিক পিটাৰ এম-য়ে।

মৃতদেহটো ছুটকেছত ভৰাই স্লোভেনিয়াৰ মেজস্পাৰ্কৰ জংঘলত পুতি ৰাখিছিল। এই হত্যাকাণ্ডই সমগ্ৰ অষ্ট্ৰিয়া আৰু স্লোভেনিয়াত চাঞ্চল্যৰ সৃষ্টি কৰিছে।

ষ্টাইৰিয়ান ষ্টেট পুলিচৰ মতে, ২৩ নৱেম্বৰত পাৰ্টিৰ পৰা উভতি অহাৰ পিছত পাইপাৰ নিৰুদ্দেশ হৈছিল। মেকআপ, ফেশ্বন আৰু সংগীত সম্পৰ্কীয় বিষয়বস্তুৰ বাবে ছ’চিয়েল মিডিয়াত তেওঁ যথেষ্ট জনপ্ৰিয় আছিল।

সংবাদ মাধ্যমৰ বাতৰি অনুসৰি পাইপাৰে পাৰ্টিৰ পিছত বন্ধু এজনলৈ বাৰ্তা প্ৰেৰণ কৰি ঘৰলৈ উভতি অহাৰ কথা জনায়। অৱশ্যে পিছত তেওঁ আন এটা মেছেজত কয়, “মই ভাবো কাঁচঘৰত কোনোবা লুকাই আছে।” তাৰ পিছৰ পৰা তেওঁক বিচাৰি পোৱা নাই।

চুবুৰীয়াই সংবাদ মাধ্যমক জনোৱা মতে, পাইপাৰ নিৰুদ্দেশ হোৱাৰ নিশা পাইপাৰৰ ঘৰৰ পৰা কাজিয়াৰ শব্দ শুনা গৈছিল। তেওঁলোকে দাবী কৰে যে সেই সময়ত তেওঁৰ প্ৰাক্তন প্ৰেমিক পিটাৰ এমক অট্টালিকাৰ ভিতৰত দেখা গৈছিল। পিছদিনা পৰিয়াল আৰু সহকৰ্মীসকলে যোগাযোগ কৰিব নোৱাৰাৰ পিছতে তেওঁ নিৰুদ্দেশ হোৱাৰ ৰিপোৰ্ট দাখিল কৰিছিল।

২৪ নৱেম্বৰত আৰক্ষীয়ে স্লোভেনিয়াৰ অষ্ট্ৰিয়াৰ সীমান্তৰ সমীপৰ কেচিনোৰ পাৰ্কিং লটত এখন জ্বলি থকা ৰঙা গাড়ী উদ্ধাৰ কৰে। গাড়ীখন পিটাৰ এমৰ আৰু জুইৰ ওচৰত সন্দেহজনক আচৰণৰ বাবে তেওঁক গ্ৰেপ্তাৰ কৰা হয়। পিছত তেওঁক অষ্ট্ৰিয়ালৈ লৈ যাবলৈ অনুৰোধ কৰা হয় আৰু স্লোভেনিয়াই তেওঁক প্ৰত্যাৰ্পণ কৰে।

কেইবাঘণ্টা ধৰি সোধা-পোছাৰ অন্তত পিটাৰ এম-য়ে পাৰ্টিৰ পিছত উত্তপ্ত কাজিয়াৰ মাজত পাইপাৰক ডিঙি চেপি হত্যা কৰা বুলি স্বীকাৰ কৰে। ইয়াৰ পিছতে মৃতদেহটো ছুটকেছত ভৰাই এখন গাড়ীৰে লৈ গৈ মেজস্পাৰ্কৰ হাবিত পুতি থৈছিল।

২৮ নৱেম্বৰত আৰক্ষীয়ে অঞ্চলটোত অভিযান চলাই ছুটকেছটো উদ্ধাৰ কৰাৰ লগতে পাইপাৰৰ মৃতদেহ উদ্ধাৰ কৰে।

ষ্টাইৰিয়ান ষ্টেট আৰক্ষীয়ে জনোৱা মতে, হত্যাকাণ্ডৰ সৈতে জড়িত লোকজনৰ ভাতৃ আৰু সতি-সন্ততিকো গ্ৰেপ্তাৰ কৰা হৈছে। তেওঁলোকে ঘটনাটো ঢাকি ৰখাত বা প্ৰমাণ ধ্বংস কৰাত সহায় কৰিছিল নে নাই তাক তদন্ত কৰি আছে।