ইলন মাস্কৰ ১৩তম সন্তান জন্ম দিয়াৰ দাবী আমেৰিকান লেখিকাৰ; গোপনে ৰাখিছিল পাঁচমাহ!

এগৰাকী আমেৰিকান লেখিকাই বিশ্বৰ আটাইতকৈ ধনী আমেৰিকান কোটিপতি ইলন মাস্কৰ ত্ৰয়োদশ সন্তান জন্ম দিয়াৰ দাবী কৰিছে। লেখিকাগৰাকীৰ নাম এছলে চেণ্ট ক্লেয়াৰ।

শুকুৰবাৰে ছ’চিয়েল মিডিয়াত এটা পোষ্ট যোগে তেওঁ এই দাবী কৰে। প্ৰায় পাঁচ মাহ পূৰ্বে সন্তান জন্ম দিয়া বুলিও কয় তেওঁ। সেই সন্তানৰ পিতৃ হৈছে ইলন মাস্ক।

ৰাষ্ট্ৰপতি ড’নাল্ড ট্ৰাম্পৰ নিৰ্বাচনী প্ৰচাৰত অভিলেখ পৰিমাণৰ ধন দান কৰা কোটিপতিগৰাকীয়ে এতিয়া আমেৰিকা চলাই আছে বুলি বিৰোধীয়ে দাবী কৰাৰ মাজতে এইগৰাকী আমেৰিকান লেখিকাই মাস্কৰ বিষয়ে ডাঙৰ দাবী কৰিলে।

কিন্তু ইমান দিনৰ মূৰত ইমান ডাঙৰ বিষয়টো এটা পোহৰলৈ আনিলে কিয়? লেখিকাগৰাকীয়ে দাবী কৰিছে যে তেওঁ ইমান দিনে বিষয়টো গোপন কৰি ৰাখিছিল কাৰণ তেওঁ নিজৰ সন্তানৰ সুৰক্ষা আৰু গোপনীয়তাক অগ্ৰাধিকাৰ দিছিল।

এছলেই দাবী কৰে যে তেওঁৰ সন্তানৰ বাতৰিৰ বিষয়ে এক টেবলয়ড সংবাদ মাধ্যমে গম পোৱাত তাৰ আগতেই তেওঁ নিজেই সত্যটো প্ৰকাশ কৰিছে। ইয়াৰ পূৰ্বে ইলন মাস্কৰ চাৰিগৰাকী মহিলাৰ সৈতে ১২টা সন্তান আছে।

এছলেই দাবী কৰে যে তেওঁ মাস্কৰ ত্ৰয়োদশ সন্তানৰ জন্ম দিছে। ‘এলিফেণ্ট আৰ নট বাৰ্ডছ’ নামৰ এখন গ্ৰন্থ লিখি জনপ্ৰিয় হৈ পৰিছিল এছলে।

টেছলাৰ প্ৰতিষ্ঠাপক ইলন মাস্কৰ প্ৰথম পত্নী জাষ্টিন উইলছনৰ সৈতে পাঁচটা সন্তান আছে। ইয়াৰ ভিতৰত—প্ৰথমে যমজ সন্তান ভিভিয়ান আৰু গ্ৰীফিন, আৰু তাৰ পিছত তিনি সন্তান কাই, চেক্সন আৰু ডেমিয়ান।

পপ তাৰকা গ্ৰাইমছৰ সৈতে মাস্কৰ তিনিটা সন্তান আছে। যাৰ ভিতৰত আছে হোয়াইট হাউছত মাস্কৰ সৈতে দেখা পোৱা সৰু পুত্ৰ এক্স, কন্যা এক্সা ডাৰ্ক চাইডেৰেল আৰু পুত্ৰ টেকনো মেকানিকাছ।

নিউৰালিংকৰ কাৰ্যবাহী ছিওভান গিলিছৰ সৈতেও মাস্কৰ যমজ সন্তান আছে। যোৱা বৃহস্পতিবাৰে ভাৰতৰ প্ৰধানমন্ত্ৰী মোদীৰ সৈতে হোৱা বৈঠকৰ সময়ত তেওঁলোকক দেখা গৈছিল।