হাতী মানুহৰ সংঘাতৰ পটভূমিত গোলাঘাটৰ পোৰাবাংলাত আৰণ্যকৰ সজাগতা সভা

হাতী মানুহৰ সংঘাতে জটিল ৰূপ ধাৰণ কৰা গোলাঘাট জিলাৰ মৰঙিৰ পোৰাবাংলাত বৃহস্পতিবাৰে প্ৰকৃতি সংগঠন আৰণ্যকৰ  উদ্যোগত এক বিশেষ সজাগতা সভা অনুষ্ঠিত হয় ৷

মৰঙি উন্নয়ন খণ্ডৰ প্ৰেক্ষাগৃহত আয়োজিত এই সভাত জিলাখনৰ নামবৰ – দৈগ্ৰোং আৰু বিজুলী সংৰক্ষিত বনাঞ্চলৰ কাষৰীয় হাতী উপদ্ৰুত অঞ্চলৰ গাওঁৰক্ষী বাহিনীৰ সদস্য ,চৰকাৰী গাওঁবুঢ়া, গাওঁ পঞ্চায়তৰ প্ৰতিনিধিৰ উপৰিও চাহ বাগিছাৰ কৰ্তৃপক্ষৰ প্ৰতিনিধিয়ে অংশ গ্ৰহন কৰে ৷

গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়াৰ পৌৰহিত্যত অনুষ্ঠিত এই সভাত গোলাঘাট জিলাৰ সহকাৰী আয়ুক্ত মিতালী লহকৰ,গোলাঘাট বন সংমণ্ডলৰ সহকাৰী বন সংৰক্ষক প্ৰফুল্ল চন্দ্ৰ লহকৰ, ৰাজীৱ হাজৰিকা, মৰঙিৰ ৰাজহ চক্ৰ বিষয়া বনশ্ৰী মালাকাৰ, মৰঙি জিলা পৰিষদৰ সদস্য পুৰৱী শৰ্মা, চিলঙৰ ইক’ স্প্ৰিচুয়েল মিছন ইণ্ডিয়াৰ অধ্যাপক টি পিটাৰ আৰু তেওঁ পত্নী উপস্থিত থাকে ৷

আৰণ্যকৰ সমন্বয়ক নিৰঞ্জন ভূঞাৰ আদৰণী ভাষণেৰে আৰম্ভ হোৱা সভাত বিশ্বৰ ঐতিহ্য নায়ক ড৹ বিভূতি প্ৰসাদ লহকৰে সমল ব্যক্তি হিচাবে অংশ গ্ৰহন কৰি ৰাজ্যত উদ্ভৱ হোৱা হাতী মানুহৰ সংঘাতৰ সমস্যাৰ সচিত্ৰ উপস্থাপন কৰাৰ লগতে এই সমস্যা সমাধানৰ বিভিন্ন সমাধানো তথ্য সহ দাঙি ধৰে ৷

সভাত আমন্ত্ৰিত অতিথিৰ উপৰিও গাওঁৰক্ষী বাহিনীৰ বগীজান থানা সমিতিৰ সভাপতি থানেশ্বৰ হাজৰিকা,নুমলীগড় থানা সমিতিৰ সভাপতি যোগেন বৰুৱা,পূব মৰঙি গাওঁ পঞ্চায়তৰ সভানেত্ৰী  প্ৰতিমা গগৈ আৰু সাংবাদিক ঋতুৰাজ ফুকনে বক্তৱ্য আগবঢ়ায়।

তেওঁলোকে হাতী মানুহৰ সংঘাতৰ পটভূমিত জিলাখনৰ জনসাধাৰণে ভোগ কৰা সমস্যাৰ সন্দৰ্ভ বিবৰণ দাঙি ধৰি বৃহত্তৰ অঞ্চলটোত হাতীৰ দণ্ডি চিনাক্তকৰণ কৰি সংৰক্ষণ কৰা, শস্য সুৰক্ষা বাহিনী গঠন কৰা, প্ৰশিক্ষণ প্ৰদান,হাতী উপদ্ৰুত অঞ্চলত বন শিৱিৰ স্থাপন কৰা, হাতীৰ দণ্ডিৰ চাহ বাগিছাৰ পৰা ব্লেড ফেঞ্চিং আঁতৰোৱা আৰু গাঁৱে গাঁৱে সজাগতা সৃষ্টিকে ধৰি ভালেমান পৰামৰ্শ আগবঢ়ায় ৷