বিশিষ্ট সাহিত্যিক হোমেন বৰগোহাঞিৰ মৃত্যুত অসম জাতীয় পৰিষদৰ শোকপ্ৰকাশ

অসমীয়া জাতিৰ বিবেকস্বৰূপ, স্বনামধন্য কথাশিল্পী হোমেন বৰগোহাঞিৰ জীৱনাসনৰ বাতৰিত শোকস্তব্ধ হৈ পৰিছে অসম জাতীয় পৰিষদ পৰিয়াল৷ সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তিত এইদৰে কয় আঞ্চলিক ৰাজনৈতিক দল অসম জাতীয় পৰিষদে।

অসমীয়া ভাষা, সাহিত্য আৰু সংবাদ জগতলৈ অতুলনীয় অৱদান আগবঢ়াই জাতিটোক সমৃদ্ধ কৰা মহীৰূহস্বৰূপ এইগৰাকী মহান সত্বাৰ মত্যুয়ে জাতীয় জীৱনক উকা কৰি গ’ল বুলি মত প্ৰকাশ কৰিছে জাতীয় পৰিষদৰ সভাপতি লুৰীণজ্যোতি গগৈ আৰু সাধাৰণ সম্পাদক জগদীশ ভূঞাই৷

এক বাৰ্তাত শ্ৰী গগৈ আৰু শ্ৰী ভূঞাই গভীৰ শোক ব্যক্ত কৰি কয় যে অসমীয়া সাহিত্য, সংবাদ আৰু সামাজিক চিন্তাৰ জগতত একেলগে ইমানখিনি অৱদান আগবঢ়াই হোমেন বৰগোহাঞিয়ে কলোছাচসদৃশ যি মুৰ্তি অসমবাসীৰ মনত গঢ়ি গ’ল, ই চিৰদিনলৈ অক্ষত থাকিব৷

অসম জাতীয় পৰিষদৰ ৰাজনৈতিক অভিৱৰ্তনত দলটোক আশীৰ্বাদ দিবলৈ শাৰীৰিক অসুস্থতা নেওচি গুৱাহাটীৰ পৰা গৈ শিৱসাগৰত উপস্থিত হোৱা বৰগোহাঞিৰ উপদেশাৱলী জাতীয় পৰিষদৰ প্ৰতিজন কৰ্মকৰ্তাই হৃদয়ত স্থাপন কৰি ভৱিষ্যতৰ দিশলৈ আগবাঢ়িব বুলি শ্ৰী গগৈ আৰু শ্ৰী ভূঞাই মত প্ৰকাশ কৰে৷