অবৈধ বাংলাদেশীৰ তালিকা দিবলৈ ভাৰতক প্ৰত্যাহ্বান বাংলাদেশৰ

প্ৰধান মন্ত্ৰী মোদীয়ে তেওঁ ২০১৪ চনৰ নিৰ্বাচনী সভাবোৰত “দেশপ্ৰেমী” নাগৰিকসকলৰ আগত কৰা এটা অংগিকাৰ ৰক্ষাৰ সোণালী সুযোগ পাইছে।

উক্ত নিৰ্বাচনী সভাবোৰত মোদীয়ে তেওঁৰ সমাৱেশবোৰত যথেষ্ট আস্ফালনেৰে কৈছিল যে বিজেপি শাসনলৈ আহিলে ১৬ মে’ৰ (লোকসভা নিৰ্বাচন ২০১৪-ৰ ফল ঘোষণাৰ তাৰিখ) পিছত ভাৰতত থকা প্ৰতিজন অবৈধ বাংলাদেশীয়ে টালি-টোপোলা বান্ধিব লাগিব।

মোদীয়ে দিয়া এই হুংকাৰৰ প্ৰতি প্ৰায় ৬ বছৰৰ পিছত সঁহাৰি জনাই চুবুৰীয়া দেশখনৰ বৈদেশিক মন্ত্ৰী এ কে আব্দুল মমেনে যোৱা ১৫ ডিচেম্বৰত (১৬ ডিচেম্বৰ, ২০১৯) কৈছে যে “ভাৰতে অবৈধ বাংলাদেশীৰ তালিকা দিয়ক, আমি ঘূৰাই ল’ম”।

অৱশ্যে মোদীয়ে চুবুৰীয়া দেশৰ মন্ত্ৰীজনে আগ বঢ়োৱা প্ৰত্যাহ্বানটোৰ প্ৰতিক্ৰিয়াত বা তেওঁৰ অংগিকাৰটো ৰক্ষাৰ এই নতুন সুযোগটো সম্বন্ধে এতিয়ালৈকে একো কোৱা নাই।

ভাৰতে ধৰ্মভিত্তিক নাগৰিকত্ব বিধেয়কখন গৃহীত কৰাৰ পিছদিনাই ব্যস্ত সূচীৰ দোহাই দি যোৱা ১২ ডিচেম্বৰত ভাৰত ভ্ৰমণ বাতিল কৰা বিদেশ মন্ত্ৰী আব্দুল মমেনে ১৫ ডিচেম্বৰত সংবাদ মাধ্যমৰ আগত কয়, যে ভাৰত আৰু বাংলাদেশৰ সম্পৰ্ক “স্বাভাৱিক আৰু মধুৰ” হৈ আছে।

ভাৰতত এন আৰ চি প্ৰক্ৰিয়াই দেশখনত থকা অবৈধ বাংলাদেশী নাগৰিকসকলক বিতাড়িত কৰিব নেকি বুলি সাংবাদিকে সোধা এটা প্ৰশ্নৰ উত্তৰত মন্ত্ৰীজনৰ এই মন্তব্য।

তেওঁ এন আৰ চি প্ৰক্ৰিয়া ভাৰতৰ “অভ্যন্তৰীণ বিষয়” বুলি দোহাৰে আৰু ইয়াৰ পৰা তেনেকুৱা পৰণতি অস্বীকাৰ কৰে।

প্ৰসংগটোত তেওঁ আৰু কয়, বাংলাদেশে নতুন দিল্লীক দেশখনত “যদি আছে” অবৈধভাৱে বাস কৰা বাংলাদেশী নাগৰিকৰ তালিকা দিবলৈ অনুৰোধ কৰিছে।

“আমি তেওঁলোকক (বাংলাদেশী নাগৰিকসকলক) ঘূৰি আহিবলৈ অনুমতি দিম, কাৰণ তেওঁলোকৰ নিজৰ দেশত প্ৰৱেশ কৰাৰ অধিকাৰ আছে”, ভাৰতত থকা অবৈধ বাংলাদেশী সন্দৰ্ভত মমেনৰ মন্তব্য।

লগতে তেওঁ কয়, “কিন্তু যদি আমাৰ নাগৰিকৰ বাদে আন নাগৰিক আমাৰ ভূমিত প্ৰৱেশ কৰে, আমি তেওঁলোকক ঘূৰাই পঠাম”।

অৰ্থনৈতিক কাৰণত সীমান্ত পাৰ হৈ ভাৰতীয় নাগৰিকো অবৈধভাৱে বাংলাদেশত প্ৰৱেশ কৰি আছে বুলি দাবী কৰে বিদেশ মন্ত্ৰীজনে।

মমেনৰ মন্তব্য গুৰুত্বসহ ভাৰতৰ ৰাষ্ট্ৰীয় সংবাদ মাধ্যমত প্ৰকাশ পাইছে আৰু ছ’চিয়েল মিডিয়াত মোদীক কটাক্ষ কৰি কোৱা হৈছে যে প্ৰধান মন্ত্ৰীজনৰ “অসামৰ্থ্য”ক মিছা প্ৰমাণ কৰাৰ বাবে এইটো এটা সোণালী সুযোগ।