সলনি হ’ল বাংলাদেশী কয়দীৰ ব্ৰেকফাষ্টৰ মেনু
ব্ৰেকফাষ্টৰ ক্ষেত্ৰত বিগত ২০০ বছৰ ধৰি চলি অহা পৰম্পৰাগত নিয়ম ভংগ কৰি বাংলাদেশ চৰকাৰে এতিয়াৰ পৰা কাৰাবন্দীসকলক স্বাস্থ্যকৰ ব্ৰেকফাষ্ট যোগান ধৰাৰ সিদ্ধান্ত গ্ৰহণ কৰিছে।
প্ৰাপ্ত খবৰ অনুসৰি, বাংলাদেশৰ কাৰাবন্দীৰ নতুন ব্ৰেকফাষ্ট মেনু হ’ব কচুৰী, ব্ৰেদ, সেউজীয়া শাক-পাচলি আৰু মিঠাই।
দেওবাৰে বাংলাদেশৰ গৃহমন্ত্ৰী আচ্ছাদুজামান খান কামালে কেৰাণীগঞ্জ কেন্দ্ৰীয় কাৰাগাৰত নতুনকৈ মুকলি কৰা ব্ৰেকফাষ্টৰ খাদ্য তালিকা উদ্বোধন কৰে।
কাৰাবন্দীসকলৰ দৈহিক স্বাস্থ্যৰ প্ৰতি লক্ষ্য ৰাখি বাংলাদেশ চৰকাৰে ব্ৰিটিছৰ দিনৰ পৰা চলি অহা ব্ৰেকফাষ্টৰ তালিকা সলনি কৰাৰ বাবে সিদ্ধান্ত গ্ৰহণ কৰে।
উল্লেখযোগ্য যে, ইয়াৰপূৰ্বে বাংলাদেশৰ কাৰাবন্দীসকলে অতি কম পৰিমাণত পাওৰুটি আৰু গুড় দৈনিক ব্ৰেকফাষ্ট হিচাপে লাভ কৰিছিল।
বাংলাদেশ চৰকাৰে ব্ৰেকফাষ্টৰ তালিকা উন্নত কৰাৰ উপৰিও কাৰাবন্দীসকলে যাতে কাৰাগাৰৰ পৰা মুকলি হৈ গৈ পুনৰ নতুন জীৱন লাভ কৰিব পাৰে আৰু অপৰাধমূলক কাম-কাজত লিপ্ত নহয় তাৰবাবে বিভিন্নধৰণৰ প্ৰশিক্ষণ কাৰ্য্যসূচী গ্ৰহণ কৰিছে।
আনহাতে, কাৰাবন্দীসকলে যাতে ইচ্ছা কৰিলে পৰিয়ালৰ লোকৰ সৈতে কথা পাতিব পাৰে তাৰবাবে বাংলাদেশ চৰকাৰে কাৰাগাৰত টেলিফোনৰ সুবিধাও নতুনকৈ কাৰাবন্দীসকলক প্ৰদান কৰিছে।
বৰ্তমান বাংলাদেশত ১১ খন কেন্দ্ৰীয় কাৰাগাৰ আৰু ৫৫ খন জিলা কাৰাগাৰকে ধৰি মুঠ ৬৬ খন কাৰাগাৰ আছে।