‘শূদ্ৰসকলে একো কথাই বুজি নেপায়’, বিজেপি সাংসদ প্ৰজ্ঞা ঠাকুৰৰ বিতৰ্কিত মন্তব্য

পুনৰ এক বিতৰ্কিত মন্তব্য কৰিছে বিজেপিৰ বিতৰ্কিত সাংসদ প্ৰজ্ঞা ঠাকুৰে।

পশ্চিমবংগত বিজেপিৰ ৰাষ্ট্ৰীয় সভাপতি জেপি নেড্ডাৰ কনভয়ত সংঘটিত আক্ৰমণৰ ঘটনাৰ সন্দৰ্ভত প্ৰতিক্ৰিয়া প্ৰকাশ কৰিবলৈ গৈ পুনৰ বিতৰ্কিত মন্তব্য কৰিছে বিজেপিৰ সাংসদগৰাকীয়ে।

তৃণমূল কংগ্ৰেছক ‘মূৰ্খ’ হোৱা বুলি অভিহিত কৰি প্ৰজ্ঞা ঠাকুৰে কয় যে “তেওঁ(মমতা বেনাৰ্জী) বুজা উচিত এইখন পাকিস্তান নহয়, ভাৰত হয়। হিন্দুসকলে ভাৰতক সুৰক্ষিত কৰিবই আৰু তেওঁক যথোচিত প্ৰত্যুত্তৰ দিব। বিধানসভাৰ নিৰ্বাচনত জয়ী হৈ বিজেপিয়ে পশ্চিমবংগত হিন্দুৰাজ প্ৰতিষ্ঠা কৰিব।”

মমতা বেনাৰ্জীক হতাশাগ্ৰস্ত হোৱা বুলি দাবী কৰি সাংসদগৰাকীয়ে লগতে কয়, “তেওঁ হতাশাগ্ৰস্ত হৈছে, বলিয়াৰ দৰে হৈছে। কাৰণ তেওঁৰ শাসন অন্ত পৰিবলৈ গৈ আছে।”

ইয়াৰ পিছতে অতি বিতৰ্কিত আৰু বৰ্ণ বিদ্বেষী মন্তব্য কৰে বিজেপিৰ সাংসদগৰাকীয়ে।

“ক্ষত্ৰিয় ক’লে ক্ষত্ৰিয়সকলে বেয়া নেপায়। ব্ৰাহ্মণসকলক আমি ব্ৰাহ্মণ ক’লেও বেয়া নেপায়। আমি বৈশ্যসকলক বৈশ্য বুলি ক’লে বেয়া নেপায়। কিন্তু শূদ্ৰসকলক আমি শূদ্ৰ বুলি ক’লে কিয় বেয়া পায়? কাৰণ তেওঁলোকে একো বুজি নেপায়।” বিতৰ্কিত সাংসদগৰাকীয়ে এইদৰে বিতৰ্কিত তথা বৰ্ণবিদ্বেষী মন্তব্য কৰে।

উল্লেখ্য বিতৰ্কিত সাংসদ প্ৰজ্ঞা ঠাকুৰ ২০০৮ চনৰ মালেগাঁও বোমা বিস্ফোৰণত জড়িত থকাৰ অভিযোগত অভিযুক্ত আছিল।