পুষ্পম প্ৰিয়াৰ মদৰ অফাৰ! কোন এইগৰাকী বিহাৰৰ নিৰ্বাচনত মুখ্য মন্ত্ৰী পদৰ মহিলা প্ৰাৰ্থী?
বিহাৰৰ জনসাধাৰণক পুনৰ ৰঙীণ পানীয়ৰ আৱেশত মতলীয়া কৰি তোলাৰ অফাৰ দিছে এগৰাকী প্ৰাৰ্থীয়ে! প্লুৰেল্ছ পাৰ্টিৰ মুৰব্বী তথা বিহাৰ নিৰ্বাচনত দলৰ মুখ্য মন্ত্ৰী পদৰ প্ৰাৰ্থী এইগৰাকী হ’ল পুষ্পম প্ৰিয়া চৌধুৰী।
নিজৰ এক টুইটত তেওঁ এনেকুৱা এক মন্তব্য কৰি সমালোচনাৰ লক্ষ্য হৈ পৰিছে।
বিহাৰৰ বৰ্তমান শাসনাধীষ্ঠ চৰকাৰৰ মুখ্য মন্ত্ৰী নীতিশ কুমাৰে ৰাজ্যখনত মদ নিষিদ্ধ কৰি অপৰাধ হ্ৰাস কৰাৰ বাবে এক কঠোৰ পদক্ষেপ গ্ৰহণ কৰিছে। ইয়াৰ দ্বাৰা তেওঁ বিশেষ জনপ্ৰিয়তাও অৰ্জন কৰিছিল।
এই নিয়ম অনুসৰি ৰাজ্যখনত মদ ক্ৰয়-বিক্ৰয় তথা পান কৰিলে শাস্তিৰ সন্মুখীন হ’ব লাগে। তদুপৰি, ইয়াৰ ফলত বিহাৰত অপৰাধৰ মাত্ৰাও হ্ৰাস পোৱা বুলি কোৱা হৈছে।
কিন্তু এই নিষেধাজ্ঞাৰ ফলত মদৰ ব্যৱসায়ত বৃহৎ লোকচান ঘটিছে। চোৰাংভাৱে মদৰ কাৰবাৰো চলি আছে।
বিহাৰৰ নিৰ্বাচনত এইবাৰ এই বিষয়টোৱে হঠাতে গুৰুত্বপূৰ্ণ স্থান লাভ কৰিছে। আন বিৰোধী দলে ইয়াক ইচ্ছ্যু কৰা নাই যদিও প্লুৰেল্ছ পাৰ্টিৰ নেত্ৰী পুষ্পম প্ৰিয়া চৌধুৰীয়ে টুইট কৰি মদৰ ব্যৱসায় পুনৰ আৰম্ভ কৰাৰ বাবে দিয়া বাৰ্তাই ৰাজ্যখনত তুমুল চৰ্চা লাভ কৰিছে।
कभी ग्रीस और रोम तक विश्वविख्यात पाटलिपुत्र-पटना-बांकीपुर को ख़ुशनुमा शाम, हैंगआउट प्लेस देकर और दक़ियानूसी शराबबंदी से मुक्त कॉस्मोपोलिटन कैपिटल कौन बनाएगा? मैं? नहीं, आपका शानदार वोट, शानदार भविष्य के लिए! मनहूस, थके हुए लोगों को भगाइए, ग्लोबल बन आगे बढ़ते हैं। #ChooseProgress pic.twitter.com/8pVoqWMq1s
— Pushpam Priya Choudhary (@pushpampc13) October 31, 2020
ইয়াৰ পূৰ্বে পুষ্পম প্ৰিয়াই প্ৰথম পৰ্যায়ৰ নিৰ্বাচনত ৰাষ্ট্ৰপতি শাসনৰ দাবী জনাই ৰাজভৱনলৈ প্ৰতিবাদী যাত্ৰাৰ সময়ত আৰক্ষীৰ হাতত গ্ৰেপ্তাৰ হৈছিল।
উল্লেখ্য যে লণ্ডন স্কুল অফ ইক’নমিকছৰ প্ৰাক্তন শিক্ষাৰ্থী পুষ্পম প্ৰিয়া বিহাৰৰ ৰাজনীতিত সম্প্ৰতি এক বহুচৰ্চিত নাম।
বিহাৰ বিধানসভা নিৰ্বাচনৰ ২৪৩খন আসনতেই প্ৰাৰ্থী থিয় কৰোৱা পুষ্পম প্ৰিয়া বাঁকিপুৰ সমষ্টিৰ প্লুৰেল্ছ পাৰ্টিৰ প্ৰাৰ্থী।
নিজকে মুখ্য মন্ত্ৰী পদৰ প্ৰাৰ্থী হিচাপে ঘোষণা কৰি নৱগঠিত প্লুৰেল্ছ পাৰ্টিৰ প্ৰাৰ্থী হিচাপে নিৰ্বাচনত অৱতীৰ্ণ হোৱা উচ্চ শিক্ষিতা যুৱতী পুষ্পম প্ৰিয়াই আধুনিক বিহাৰ গঢ়াৰ আহ্বান দিছে।
ছচিয়েল মিডায়ক নিজৰ নিৰ্বাচনী যুঁজৰ অস্ত্ৰ হিচাপে ব্যৱহাৰ কৰা পুষ্পম প্ৰিয়াৰ কিছু অপৰিপক্ক ৰাজনৈতিক ভাষ্যই বিতৰ্কৰো সৃষ্টি কৰিছে।
শেহতীয়াকৈ তেওঁ মদৰ ব্যৱসায় পুনৰ আৰম্ভ কৰাৰ বাবে দিয়া প্ৰতিশ্ৰুতিৰ বিষয়টোৱে ৰাজ্যখনত ব্যাপক চৰ্চাৰ কেন্দ্ৰবিন্দু হৈ পৰিছে।