সতীনাথ বাৰালৰ বিৰুদ্ধে দিচপুৰ থানাত এজাহাৰ দাখিল বীৰ লাচিত সেনাৰ : সতীনাথক নিজে অসমত আহি ক্ষমা খোজাৰ দাবী

শংকৰদেৱক অপমান কৰাৰ লগতে অসমবাসীক মূৰ্খ বুলি কোৱা পতঞ্জলিৰ যোগ নিৰীক্ষক সতীনাথ বাৰালক উত্তৰ-পূবৰ দায়িত্বৰ পৰা অব্যাহতি দিয়াৰ লগতে ৰামদেৱে নিউজ চেনেল এ এন আইৰ জৰিয়তে ক্ষমা বিচৰাৰ পাছতো ক্ষান্ত নহয় বীৰ লাচিত সেনা।

সেয়েহে আজি বীৰ লাচিত সেনাৰ মহানগৰ শাখাই পলমকৈ হ’লেও দিচপুৰ থানাত এখন এজাহাৰ দাখিল কৰে সতীনাথ বাৰালৰ বিৰুদ্ধে।

জগতগুৰু শ্ৰীমন্ত শংকৰদেৱ আৰু অসমীয়া জাতিৰ আৱেগ-অনুভূতি তথা ধৰ্মীয় অনুভূতিত আঘাত দি অপমানসূচক আৰু টুলুঙা মন্তব্য দিয়াৰ বাবে তেওঁক অতি সোনকালে গ্ৰেপ্তাৰ কৰাৰ বাবে দাবী তুলি এই এজাহাৰ দাখিল কৰে।

উল্লেখ্য যে, বীৰ লাচিত সেনা অসমে সতীনাথ বাৰালক নিজে অসমত উপস্থিত হৈ ক্ষমা খোজাৰ বাবে দাবী জনায়।

লগতে, চূড়ান্ত তদন্ত প্ৰক্ৰিয়া সম্পূৰ্ণ নোহোৱা পৰ্য্যন্ত বীৰ লাচিত সেনাই সমগ্ৰ অসমতে পতঞ্জলি নামৰ প্ৰতিষ্ঠানটো বন্ধ ৰাখিবৰ বাবে দাবী জনায়।

তদুপৰি, এজাহাৰখন দাখিল কৰাৰ পাছতেই বীৰ লাচিত সেনা, অসমৰ কামৰূপ মেট্ৰ’ৰ সাংগঠনিক সম্পাদক ৰাজদ্বীপ বৰুৱাই নৰ্থ-ইষ্ট নাওৰ আগত কয়, “সতীনাথ বাৰালক গ্ৰেপ্তাৰ নকৰা পৰ্য্যন্ত বীৰ লাচিত সেনা অসম ক্ষান্ত নাথাকে।”

আনহাতে, পতঞ্জলিৰ নিৰীক্ষকগৰাকীক অব্যাহতি দিয়া কাৰ্য্যটো দেখুৱাবৰ বাবেহে কৰা হৈছে বুলি দাবী কৰে সাংগঠনিক সম্পাদকগৰাকীয়ে।

তেওঁ লগতে কয়, “পতঞ্জলিয়ে শংকৰদেৱ অসমৰ বাবে কি হয়, নাজানে একো। সেয়েহে এনেদৰে টুলুঙা মন্তব্য কৰিছে। সতীনাথ বাৰালে মন্তব্য কৰাৰ আগতে শংকৰদেৱৰ বিষয়ে অধ্যয়ন কৰি জানি লোৱাটো ভাল আছিল।”

আনহাতে, সতীনাথ বাৰালক গ্ৰেপ্তাৰ নকৰা পৰ্য্যন্ত মহানগৰৰ যিমান সংখ্যক পতঞ্জলিৰ বিপণি আছে, সেইবোৰ খুলিবলৈ দিয়া নহ’ব বুলিও দাবী জনায়।

উল্লেখ্য যে, মহাপুৰুষ শ্ৰীমন্ত শংকৰদেৱৰ বিৰুদ্ধে পতঞ্জলিৰ যোগ নিৰীক্ষক সতীনাথ বাৰালে কৰা কটু মন্তব্যৰ বিৰুদ্ধে বীৰ লাচিত সেনাৰ বোকাখাত গোটে কালি বোকাখাতত থকা পতঞ্জলিৰ সকলো প্ৰতিষ্ঠান বন্ধ কৰি দিছিল।