নাগৰিকত্বৰ পূৰ্বে ভোটাৰ তালিকাত নাম সোমাইছিল ছোনিয়া গান্ধীৰ! বিস্ফোৰক অভিযোগ অমিত মালব্যৰ

শাসকীয় বিজেপিৰ বিৰুদ্ধে ভোটাৰ তালিকাক লৈ হেতালি খেলাৰ বিষয়টো উত্থাপন কৰিছে কংগ্ৰেছে। দেশজুৰি বিৰোধী দলসমূহে বিজেপিৰ বিৰুদ্ধে ভোটাৰ জালিয়াতিৰ অভিযোগ উত্থাপন কৰিছে। SIR বিষয়ক লৈ লোকসভাত ৰাহুল গান্ধীৰ কাষত থিয় দিছে তৃণমূল নেতা অভিষেক বেনাৰ্জীয়ে। এনে পৰিপ্ৰেক্ষিতত বিজেপিৰ আই টি চেলৰ মুৰব্বী অমিত মালব্যই বিস্ফোৰক দাবী উত্থাপন কৰিছে। তেওঁ অভিযোগ কৰে যে ছোনিয়া গান্ধীৰ নাগৰিক হোৱাৰ পূৰ্বে ভোটাৰ তালিকাত নাম আছিল।

বিজেপি নেতা অনুৰাগ ঠাকুৰেও মালব্যৰ সুৰত যোগ দিছে। তেওঁ দাবী কৰিছিল যে ১৯৮০ চনত ছোনিয়া গান্ধীৰ নাম ভোটাৰ তালিকাত অন্তৰ্ভুক্ত হৈছিল।যদিও তিনি বছৰৰ পিছত ভাৰতীয় নাগৰিকত্ব লাভ কৰিছিল। বুধবাৰে মালব্যই নিজৰ এক্স হেণ্ডেলত ১৯৮০ চনত দিল্লীৰ এটা বুথৰ তালিকাৰ ছবি পোষ্ট কৰে। সেই তালিকাত ছোনিয়া গান্ধীৰ নাম দেখা গৈছিল।

মালব্যৰ এই পোষ্টটোত ছফদাৰজং ৰোডৰ ১৪৫ নম্বৰ বুথৰ তালিকাৰ এখন ছবি পোৱা গৈছে। এই তালিকাত ইন্দিৰা গান্ধী, ৰাজীৱ গান্ধী, সঞ্জয় গান্ধী, ছোনিয়া গান্ধী আৰু মানেকা গান্ধীৰ নাম সন্নিবিষ্ট কৰা হৈছে। মালব্যই দাবী কৰে যে ১৯৮০ চনৰ ভোটাৰ তালিকা সংশোধন কৰাৰ সময়ত ছোনিয়াৰ নাম সংযোজন কৰা হৈছিল। তেওঁ আৰু দাবী কৰে যে ১৯৮২ চনত তেওঁৰ নাম আঁতৰোৱাৰ বিৰোধিতা জনসাধাৰণৰ পাছতো ১৯৮৩ চনৰ জানুৱাৰী মাহত তেওঁক পুনৰ তালিকাভুক্ত কৰা হয়।কিন্তু ১৯৮৩ চনৰ এপ্ৰিল মাহত ছোনিয়াই ভাৰতীয় নাগৰিকত্ব লাভ কৰে।

মালব্যৰ মতে, অবৈধভাৱে ছোনিয়াৰ নাম ভোটাৰ তালিকাত অন্তৰ্ভুক্ত কৰা হৈছিল। তেওঁ আৰু দাবী কৰে যে এই কাৰণেই ৰাহুল গান্ধীয়ে এছ আই আৰৰ বিৰোধিতা কৰি অবৈধ ভোটাৰক ভোটাধিকাৰ দিবলৈ চেষ্টা কৰিছে।

প্ৰসংগক্ৰমে, ১৯৪৬ চনত ইটালীত জন্মগ্ৰহণ কৰা ছোনিয়া গান্ধীয়ে ১৯৬৮ চনত ৰাজীৱ গান্ধীৰ সৈতে বিবাহপাশত আবদ্ধ হোৱাৰ পিছত ভাৰতলৈ আহিছিল।