তামুলপুৰত ৰাজ্যিক সভাপতি ৰঞ্জিত দাসৰ ঘোষণা: বিজেপিৰ নেতৃত্বত গঠন হ’ব বিটিচি পৰিষদ

বাক্সা জিলাৰ তামুলপুৰত ৰাজ্যিক বিজেপিৰ সভাপতি ৰঞ্জিত কুমাৰ দাসে দেওবাৰে বিটিচি পৰিষদীয় নিৰ্বাচনৰ ৰণডংকা বজায়।

তামুলপুৰ বিধানসভা সমষ্টিৰ  অন্তৰ্গত ২৮ নম্বৰ গয়বাৰী পৰিষদীয় সমষ্টিৰ পৰাই নিৰ্বাচনী ৰণডংকা বজোৱা বুলি ঘোষণা কৰে ৰাজ্যিক বিজেপিৰ সভাপতি  ৰঞ্জিত দাসে।

আনহাতে, দেওবাৰে সন্ধিয়া ২৮ নম্বৰ গয়বাৰী আৰু ২৬ নম্বৰ দৰঙাজুলি সমষ্টিত দলীয় কাৰ্যকৰ্তাৰ সতে মত বিনিময় কৰি ৰঞ্জিত দাসে কয়, ‘’আজিৰে পৰাই আমি বিটিচি পৰিষদীয় নিৰ্বাচনৰ ৰণডংকা বজাইছো। যিহেতু অহা ১৫ ডিচেম্বৰৰ ভিতৰত বিটিচি পৰিষদীয় নিৰ্বাচন অনুষ্ঠিত কৰাৰ বাবে চিন্তা চৰ্চা কৰা হৈছে সেয়েহে আমি বিজেপি দলে আজিৰে পৰাই নিৰ্বাচনী ৰণডংকা বজাইছো।‘’

বাক্সা জিলাৰ গয়বাৰী সমষ্টিৰ পৰাই নিৰ্বাচনী ৰণডংকা বজোৱাৰ কথা ঘোষণা কৰি তেওঁ কয়, ‘’নিৰ্বাচনৰ আগলৈকে বিটিআৰ অঞ্চলত আমি অতি কমেও ৫০০ খন সভা অনুষ্ঠিত কৰিম। বিজেপি দলে প্ৰতিদ্বন্দিতা আগবঢ়োৱা আটাইকেইটা সমষ্টিৰ দলীয় প্ৰাৰ্থী সকলৰ সমৰ্থনত অসমৰ মুখ্যমন্ত্ৰী সৰ্বানন্দ সোনোৱাল, নেডাৰ আহ্বায়ক ডঃ হিমন্ত বিশ্ব শৰ্মা আদিকে ধৰি দলৰ বহু শীৰ্ষ নেতাই প্ৰচাৰ কাৰ্য চলাব।‘’

তেওঁ লগতে কয়, ‘’এইবাৰ বিজেপি দলৰ নেতৃত্বত কিম্বা বিজেপি দলৰ অংশীদাৰিত্বত বিটিচি পৰিষদ নিশ্চিতভাবে গঠন হব।  বিজেপিৰ নেতৃত্বত বা অংশীদাৰিত্বত বিটিচি পৰিষদ গঠন হ’লে বিটিআৰ অঞ্চলৰ ৰাইজে ন্যায় পাব আৰু কোনো বৈষম্য নহ’ব, নাথাকিব কোনো দুৰ্নীতি।‘’

ইয়াৰ পূৰ্বে দেওবাৰে ৰাজ্যিক বিজেপিৰ সভাপতি গৰাকীক দ্বাৰকুছিৰ পৰা বাইক ৰেলী কৰি আদৰি আনে গয়বাৰী মণ্ডল বিজেপিৰ যুৱ মৰ্চাৰ সভাপতি ধনেশ্বৰ বড়ো আৰু সাধাৰণ সম্পাদক ৰূপজ্যোতি কলিতাৰ নেতৃত্বত বিজেপিৰ শতাধিক যুৱ কাৰ্যকৰ্তাই।

সভাপতিগৰাকীক সংগ দিয়ে ৰাজ্যিক বিজেপিৰ উপ সভাপতি জয়ন্ত দাস, যুৱ মৰ্চাৰ ৰাজ্যিক সভাপতি অকণ বৰ্মন,তামুলপুৰৰ বিধায়ক ইমানুৱেল মোছাহাৰী, বাক্সা জিলা বিজেপিৰ সভাপতি ৰাম দাহাল, সাধাৰণ সম্পাদক ৰাজেশ বড়োকে আদি কৰি কেইবাজনো দলীয় নেতা কৰ্মীয়ে।