আসন্ন নিৰ্বাচন: গুৰুত্ব বাঢ়িল অমৰিন্দৰৰ; বিজেপিয়ে এৰি দিলে ৩৭ খনকৈ আসন

অহা মাহত অনুষ্ঠিত হ’বলগীয়া পঞ্জাৱৰ বিধানসভা নিৰ্বাচনৰ পূৰ্বে বিজেপি দলৰ মিত্ৰজোঁটৰ অংশীদাৰ হিচাপে থকা অমিৰিন্দৰ সিঙৰ গুৰুত্ব বৃদ্ধি পাইছে।

মুখ্যমন্ত্ৰী আসনৰ পৰা পদত্যাগ কৰি কংগ্ৰেছ দল ত্যাগ কৰাৰ পাছতে পঞ্জাৱ লোক কংগ্ৰেছ নামেৰে এক নতুন ৰাজনৈতিক দল গঠন কৰিছিল অমৰিন্দৰ সিঙে। পিছত বিজেপিৰে নিজ দলৰ মিত্ৰতা চূড়ান্ত কৰিছিল প্ৰাক্তন মুখ্যমন্ত্ৰীজনে।

আজি পঞ্জাৱ নিৰ্বাচনৰ বাবে আসন ভাগ-বাটোৱাৰা কৰি বিজেপিয়ে অমৰিন্দৰ সিঙৰ পঞ্জাৱ লোক কংগ্ৰেছৰ বাবে ৩৭ খনকৈ আসন এৰি দিয়ে। আনহাতে বিজেপিয়ে ৬৫ খন আসনত প্ৰতিদ্বন্দিতা কৰিব। মিত্ৰজোঁটৰ তৃতীয়টো অংশীদাৰ শিৰোমণি অকালি দলে (সংযুক্ত) ১৫ খন আসন লাভ কৰিছে।

দিল্লীত এক সংবাদ সন্মিলনত কেপ্টেইন সিং আৰু বিজেপিৰ মুৰব্বী জে পি নড্ডা আৰু শিৰোমণি অকালি দল (সন্নুক্ত)ৰ মুৰব্বী সুখদেৱ সিং ধিন্দছাই আসন ভাগ-বতৰা চুক্তিৰ কথা ঘোষণা কৰে।

দেশৰ প্ৰতিৰক্ষা আৰু খাদ্য সুৰক্ষাৰ ক্ষেত্ৰত পঞ্জাৱক এজন “নেতা” বুলি প্ৰশংসা কৰি নড্ডাই কয়, “আজি পঞ্জাৱক বিশেষ মনোযোগৰ প্ৰয়োজন, ইয়াক দ্বৈত ইঞ্জিন চৰকাৰৰ আৰু কেন্দ্ৰ আৰু ৰাজ্যৰ মাজত উন্নত সমন্বয়ৰ প্ৰয়োজন।”

কেপ্টেইন সিঙে দেওবাৰে ১১৭ জনীয়া বিধানসভাৰ বাবে ২২ টা সমষ্টিৰ প্ৰাৰ্থীৰ প্ৰথম খন তালিকা ঘোষণা কৰিছিল। ভাৰতীয় হকী দলৰ প্ৰাক্তন অধিনায়ক অজিত পাল সিঙৰ নামো এই তালিকাত ঠাই পাইছিল।

অমৰিন্দৰ সিঙে শনিবাৰে তেওঁৰ গৃহ সমষ্টি পাটিয়ালা আৰ্বানৰ পৰা যুঁজ দিয়াৰ সিদ্ধান্ত ঘোষণা কৰিছিল।