চামগুৰিত স্বেচ্ছাসেৱী সংস্থাৰ উদ্যোগত দৰিদ্ৰ ছাত্ৰ-ছাত্ৰীৰ মাজত কম্বল বিতৰণ

নগাঁও জিলাৰ চামগুৰিৰ লুংচুঙত ‘ব্ৰীজ টু হ’প’ নামৰ এটি স্বেচ্ছাসেৱী সংস্থাই অঞ্চলটোৰ প্ৰায় ১৪৫ গৰাকী দৰিদ্ৰ সীমা ৰেখাৰ তলৰ ছাত্ৰ-ছাত্ৰীৰ মাজত কম্বল বিতৰণ কৰে।

গ্ৰাম্যাঞ্চলৰ দৰিদ্ৰ ছাত্ৰ-ছাত্ৰীৰ প্ৰতি দেখুওৱা এই সহানুভূতিৰ বাবে স্বেচ্ছাসেৱী সংস্থাটোক ভূয়সী প্ৰশংসা কৰিছে অঞ্চলটোৰ ৰাইজে।

উল্লেখযোগ্য যে, স্বেচ্ছাসেৱী সংস্থাটোই বহু বছৰ ধৰি বৃহত্তৰ অঞ্চলটোত বিভিন্ন কাৰ্য্যসূচী গ্ৰহণ কৰি আহিছিল।

এইবাৰ সংস্থাটোই ‘চাইল্ড কেয়াৰ প্ৰজেক্ট’ নামৰ এটি প্ৰকল্প গ্ৰহণ কৰিছিল।

এই প্ৰকল্পৰ অধীনত লুংচুং অঞ্চলৰ দৰিদ্ৰ সীমা ৰেখাৰ তলৰ ছাত্ৰ-ছাত্ৰী সকলৰ মাজত সংস্থাটোৱে বিনামূলীয়াকৈ ১৪৫ খন কম্বল বিতৰণ কৰে।

সংস্থাটোৰ লুংচুংস্থিত কেন্দ্ৰটোত প্ৰায় তিনি শতাধিক স্থানীয় ৰাইজৰ উপস্থিতিত কম্বল বিতৰণ অনুষ্ঠানটোত উপস্থিত থাকে সঞ্চালক মণি কুমাৰ শ্ৰেষ্ঠা সহ উপদেষ্টা মিন্তু বৰুৱা আৰু প্ৰকল্প পৰিচালক পেৰ’জ ৰাভা।

উল্লেখযোগ্য যে,  ২০১২ চনতে সংগঠিত হোৱা “ব্ৰীজ অফ হ’প” নামৰ স্বেচ্ছাসেৱী সংস্থাটোৱে জন্মলগ্নৰে পৰা প্ৰতি বছৰেই বৃহত্তৰ অঞ্চলটোৰ শিশু সকলৰ মাজত সংস্থাৰ নিজা পূঁজিৰে ইউনিফ’ৰ্ম, গৰম জেকেট, স্কুল বেগ, কিতাপ, আঁঠুৱা, জোতা আদি বিতৰণ কৰি আহিছে।

এই বছৰৰ কম্বল বিতৰণৰ কাৰ্য্যসূচী গ্ৰহণ কৰা সংস্থাটোৰ প্ৰতিজন কৰ্মকৰ্তাই এই পদক্ষেপৰ জৰিয়তে দৰিদ্ৰ শিশু সকলক সুস্বাস্থ্যৰ অধিকাৰী কৰি অনাগত দিনত প্ৰতিজন শিশুৱেই অঞ্চলটোৰ ভিতৰত একো একো গৰাকী মানব সম্পদ হিচাপে গঢ়লৈ উঠাৰ ক্ষেত্ৰত কিছু পৰিমানে হলেও সহায় কৰিব বুলি আশাবাদী।