পুনৰ দুৰ্য্যোগ শংকা, তিব্বতত আকৌ আবদ্ধ য়াৰ্লুং চাংপ’
যোৱা ১৯ অক্টোবৰত চাংপ’ৰ পানীয়ে সৃষ্টি কৰা ভয়ংকৰ দুৰ্য্যোগৰ আশংকাৰ পৰা অসম আৰু অৰুণাচল প্ৰদেশ সৌভাগ্যক্ৰমে হাত সৰাৰ পিছত যোৱা ২৯ অক্টোবৰত তিব্বতত পুনৰ আবদ্ধ হৈ পৰিছে য়াৰলুং চাংপ’ নৈ।
বান্ধটোৰ ফলত বাঢ়ি অহা পানী বুধবাৰৰ সন্ধিয়া ৫:৫৫ বজাত অৰুণাচল প্ৰদেশৰ আপাৰ চিয়াং জিলাৰ টুটিণ্গত প্ৰৱেশ কৰিছে।
চাংপ’ৰ বিশাল ঢৌৱে দুৰ্য্যোগ সৃষ্টি কৰাৰ আশংকাত অৰুণাচল প্ৰদেশত ইতিমধ্যে হাই এলাৰ্ট জাৰি কৰিছে দুৰ্য্যোগ প্ৰশমন বিভাগে। আপাৰ চিয়াং আৰু ইষ্ট চিয়াং জিলাত বাস কৰা লোকসকলক ইতিমধ্যে মাছ মৰা, সাঁতোৰা বা নৈখনত যিকোনো কাম কৰাত বাধা আৰোপ কৰিছে অৰুণাচল প্ৰদেশৰ দুৰ্য্যোগ প্ৰশমন কৰ্তৃপক্ষই।
যোৱা ২০ অক্টোবৰৰ পানীতকৈ এইবাৰ পানীৰ ঢৌ কম হ’ব বুলি ধাৰণা কৰা হৈছে। উপগ্ৰহীয় ছবি অনুসৰি এইবাৰৰ বান্ধটোৰ দৈৰ্ঘ্য ১.৭ কি.মি.। যোৱা ১৯ অক্টোবৰত ভাগি যোৱা বান্ধটোৰ দৈৰ্ঘ্য আছিল ৩.৫ কি.মি.।
তিব্বতৰ মিলিং অঞ্চলত প্ৰচণ্ড ভূমিস্খলনৰ ফলত বান্ধটো সৃষ্টি হোৱা বুলি জানিব পৰা গৈছে।
বুধবাৰে পুৱা ৯:৩০ বজাত কৃত্ৰিম বান্ধটোৰ পানীৰ ঢৌ বাগৰা বুলি ভাৰতক জনাইছে চীনা বিভাগীয় কৰ্তৃপক্ষটোৱে।