বিদায় ববি! বিশ্বৰ আটাইতকৈ বয়স্ক কুকুৰ ববিৰ মৃত্যু
বিদায় ল’লে ববিয়ে। ৩১ বছৰ ১৬৫ দিন জীৱন কটাই বিশ্বৰ আটাইতকৈ বয়সীয়াল কুকুৰৰ খ্যাতি বহন কৰি ববিয়ে ল’লে শেষ নিশ্বাস। ৰাফেইৰো ডো আলেণ্টেজো প্ৰজাতিৰ এই কুকুৰটোৰ শনিবাৰে মৃত্যু হয়।
পৰ্তুগালৰ কনকুৱেৰ’ছত লিঅ’নেল কোষ্টা আৰু তেওঁৰ পৰিয়ালৰ সৈতে ববিয়ে কটাইছিল এই দীৰ্ঘদিনীয়া জীৱন। ১৯৯২ চনৰ ১১ মে’ত জন্ম হৈছিল ববিৰ। সাধাৰণতে ববি যি প্ৰজাতিৰ কুকুৰ সেই প্ৰজাতিৰ আয়ুস ১২ৰ পৰা ১৪ বছৰৰ ভিতৰত হয়।
কিন্তু এই পৰম্পৰা ভংগ কৰি ববি জীৱিত থাকে সুদীৰ্ঘ ৩১ টা বছৰ। গত ফেব্ৰুৱাৰী মাহত ববি বিশ্বৰ আটাইতকৈ বয়সীয়াল জীৱিত কুকুৰৰ লগতে এতিয়ালৈকে আটাইতকৈ বয়স্ক কুকুৰ হিচাপে গিনিজ ৱৰ্ল্ড ৰেকৰ্ডৰ দ্বাৰা স্বীকৃত হয়।
ববিক কেইবাবাৰো সাক্ষাৎ তথা চিকিৎসা কৰা পশু চিকিৎসক ডাঃ কেৰেন বেকাৰে ফেচবুকত কুকুৰটোৰ মৃত্যুৰ কথা নিশ্চিত কৰি এক আৱেগিক পোষ্ট কৰে। তদুপৰি গিনিজ ৱৰ্ল্ড ৰেকৰ্ডছে অফিচিয়েল ব্লগত ববিৰ জনপ্ৰিয়তাৰ কথা সুঁৱৰি শ্ৰদ্ধাঞ্জলি জনায়।
কুকুৰটোৰ জন্মৰ সময়ত মাত্ৰ আঠ বছৰীয়া আছিল কোষ্টা। ববিৰ দীৰ্ঘায়ুৰ কৃতিত্ব তেওঁ চহৰৰ পৰা বহু দূৰত থকা শান্ত, শান্তিপূৰ্ণ পৰিৱেশৰ বাবে ববিয়ে দীৰ্ঘায়ু লাভ কৰে বুলি কোষ্টাই কয়।
তেওঁ লগতে কয় যে কুকুৰটোৱে তেনে কোনো পৃথক খাদ্য খোৱা নাছিল। পৰিয়ালটোৱে সদায় যি খাদ্য খাইছিল, সেই একেই খাদ্যকে খাইছিল ববিয়ে। লগতে ববিক কেতিয়াও শিকলি লগাই বান্ধি থোৱা নাছিল বুলি জানিবলৈ দিয়ে কোষ্টাই।
উল্লেখ্য যে, ববিৰ পূৰ্বে বয়স্ক কুকুৰৰ অভিলেখ আছিল ব্লুঈ নামৰ এটা অষ্ট্ৰেলিয়ান কেট’ল ডগৰ নামত। ১৯৩৯ চনত ২৯ বছৰ পাঁচ মাহত মৃত্যু হৈছিল উক্ত কুকুৰটোৰ।