বোকাখাতত নিচাযুক্ত সামগ্ৰীৰ বিৰুদ্ধে সৰৱ ছাত্ৰ সন্থা : মহকুমাধিপতিক স্মাৰকপত্ৰ প্ৰদান

বোকাখাতত বৃদ্ধি পোৱা পথ দুৰ্ঘটনাবোৰৰ গুৰুত্বপূৰ্ণ কাৰণ হৈছে নিচাযুক্ত দ্ৰব্যৰ সেৱন আৰু প্ৰচলন। বোকাখাতৰ বহু যুৱক নিচাযুক্ত দ্ৰব্যৰ প্ৰতি আসক্ত হৈছে।

মদ, ভাং আৰু আন নিচাযুক্ত দ্ৰব্যৰ সেৱন কৰি নিজৰ জীৱন আৰু ভৱিষ্যত ধ্বংস কৰাৰ লগতে নিচাগ্ৰস্ত হৈ মটৰ চাইকেল বা গাড়ী চলাই দুৰ্ঘটনাত পতিত হৈ বহু যুৱকে অকালতে প্ৰাণো দিব লগা হৈছে।

বোকাখাতৰ বিভিন্ন স্থানত প্ৰশাসনৰ চকুত ধূলি দি অতি সংগোপনে গঢ়ি উঠা নিচাযুক্ত দ্ৰব্যৰ ঘাটি সমূহত সহজে উপলব্ধ মদ ,ভাঙৰ লগতে বিভিন্ন নিচাযুক্ত দ্ৰব্যই এইক্ষেত্ৰত অধিক অৰিহণা যোগাইছে।

নিচাযুক্ত সামগ্ৰীৰ নিয়ন্ত্ৰনত বোকাখাত মহকুমা প্ৰশাসনৰ লগতে আবকাৰী বিভাগো বিফল হোৱাত বোকাখাতৰ বিভিন্ন দল-সংগঠন, অনুষ্ঠানৰ লগতে সচেতন নাগৰিকেও উদ্বেগ প্ৰকাশ কৰিছে।

এই ক্ষেত্ৰত সম্প্ৰতি সৰৱ হৈ উঠিছে বোকাখাত আঞ্চলিক ছাত্ৰ সন্থা।

বোকাখাত আঞ্চলিক ছাত্ৰ সন্থাৰ এটি সঁজাতী দলে বৃহত্তৰ বোকাখাতত প্ৰচলিত মদ, ভাং আৰু গুটখাকে ধৰি বিভিন্ন নিচাযুক্ত দ্ৰব্যৰ প্ৰচলন বন্ধ কৰাৰ দাবীত বোকাখাত মহকুমাৰ মহকুমাধিপতিক সাক্ষাৎ কৰে।

বোকাখাত আঞ্চলিক ছাত্ৰ সন্থাৰ সভাপতি দীপ ঠাকুৰীয়া আৰু সম্পাদক সত্যব্ৰত ভূঞাই মহকুমাধিপতি বিবেক শ্যামৰ হাতত এক স্মাৰক পত্ৰ দাখিল কৰি এইক্ষেত্ৰত শীঘ্ৰেই ফলপ্ৰসু ব্যৱস্থা গ্ৰহণ কৰিবলৈ দাবী জনায়।

স্মাৰক পত্ৰত চলিত বৰ্ষতেই বোকাখাতত সংঘৰ্টিত পথ দুৰ্ঘটনাত ১৫ জন যুৱকে অকালতে প্ৰাণ হেৰুৱাইছে বুলি উল্লেখ কৰা হৈছে।

নিশাৰ ভাগত বোকাখাত নগৰৰ আশে পাশে থকা ধাবা সমূহত মুকলিকৈ মদৰ বেহা চলি থকাৰ পাচতো প্ৰশাসনে কোনো ব্যৱস্থা হাতত লোৱা দেখা নাই।

গতিকে এই ক্ষেত্ৰত প্ৰশাসনে বিহীত ব্যৱস্থা গ্ৰহণ নকৰিলে বোকাখাত আঞ্চলিক ছাত্ৰ সন্থাৰ উদ্যোগত বোকাখাতত মাদক দ্ৰব্যৰ প্ৰচলন বন্ধ কৰাৰ দাবীত প্ৰশাসনৰ বিৰুদ্ধে তীব্ৰ আন্দোলন গঢ়ি তোলা হ’ব বুলি জানিব দিয়ে।

তদুপৰি, ইয়াৰ পৰিণতিত হ’ব পৰা সম্ভাব্য যিকোনো পৰিস্থিতিৰ বাবে মহকুমা প্ৰশাসনেই দায়ী হ’ব বুলি ছাত্ৰ সংগঠনটোৰ তৰফৰ পৰা স্মাৰক পত্ৰযোগে মহকুমা প্ৰশাসনক অৱগত কৰা হয়।

আনহাতে, বোকাখাতৰ যুৱ প্ৰজন্মক নিচাযুক্ত দ্ৰব্যৰ কবলৰ পৰা মুক্ত কৰি সুন্দৰ সমাজ গঢ়ি তোলাৰ বাবে সজাগ হ’বলৈ বোকাখাত মহকুমা আঞ্চলিক ছাত্ৰ সন্থাৰ সভাপতি দীপজ্যোতি ঠাকুৰীয়া আৰু সম্পাদক সত্যব্ৰত ভূঞাই  বোকাখাতৰ ৰাইজলৈ আহ্বান জনাইছে।