Video|| সুদৃশ্য মেচুকাত চাইকেল চফৰ, মুখ্য মন্ত্ৰীক বিশেষ প্ৰতিশ্ৰুতি ছুপাৰষ্টাৰ চলমানৰ

অনাস্পৰ্শিত অৰুণাচল প্ৰদেশত পৰৱৰ্তী চিনে’মাৰ শ্বুটিং কৰিব বলিউদৰ ছুপাৰষ্টাৰ চলমান খানে।

অসমৰ চুবুৰীয়া ৰাজ্যখনৰ মেচুকাত ‘এডভেন্সাৰ এট মেছুকা’ শীৰ্ষক এক মহোৎসৱ মুকলি কৰি বৃহস্পতিবাৰে মুখ্য পেমা খান্দুক এই প্ৰতিশ্ৰুতি প্ৰদান কৰে খানে। অনুষ্ঠানটোত মেচুকাৰ লগতে অৰুণাচলৰ প্ৰাকৃতিক সৌন্দৰ্য্যৰ ভূয়সী প্ৰশংসা কৰে অভিনেতাজনে।

সুদৃশ্য মেচুকাত বৃহস্পতিবাৰে কেন্দ্ৰীয় গৃহ ৰাজ্য মন্ত্ৰী ৰিজিজু আৰু মুখ্য মন্ত্ৰী পেমা খান্দুৰ সৈতে ১০ কি: মি: জোৰা এক চাইকেল চফৰো কৰে ছুপাৰষ্টাৰজনে।

মহোৎসৱ মুকলিৰ লগতে ‘MTB Arunachal Mountain Bicycle Race’ উদ্বোধন কৰে খানে। ৭ পৰ্যায়ত অনুষ্ঠিত চাইক্লিং ইভেণ্টটোৱে ৬৫০ কি: মি: দূৰত্ব আৰু ১০খন দেশৰ চাইকেল আৰোহী সামৰি লৈছে।

মন্ত্ৰীকেইজনৰ লগতে মেচুকাত অভিনেতাজনক সংগ দিয়ে তেওঁৰ ‘টিউব লাইট’ চিনেমাত অভিনয় কৰা অৰুণাচল প্ৰদেশৰ শিশু শিল্পী মাটিন আংগু আৰু স্থানীয় বিধায়ক পাছাং দৰ্জী চোনাই।

স্থানীয় বৌদ্ধ ধৰ্মাৱলম্বী মেম্বা লোকসকলে অভিনেতাজনক পৰম্পৰাগতভাৱে আদৰণি জনোৱাৰ লগতে দুপৰীয়া পৰম্পৰাগত আহাৰেৰে আপ্যায়িত কৰে চলমানক৷

অনুষ্ঠানৰ পিছতে পুনৰ ডিব্ৰুগড় হৈ মুম্বাইলৈ উৰা মাৰে চলমান।