অপাৰেশ্যন সিন্দুৰ আৰু ভাৰতীয় সেনাক অপমান কৰা পাকিস্তানী খেলুৱৈ ক্ৰয় ছানৰাইজাৰ্ছ হায়দৰাবাদৰ

দ্য হাণ্ড্ৰেড টুৰ্ণামেন্টৰ নিলামত ছানৰাইজাৰ্ছ হায়দৰাবাদৰ স্বত্বাধিকাৰীয়ে পাকিস্তানী স্পিনাৰ আব্ৰাৰ আহমেদক ক্ৰয় কৰাৰ পিছতেই সামাজিক মাধ্যমত তীব্ৰ প্ৰতিক্ৰিয়াৰ সৃষ্টি হৈছে। ভাৰতীয় ক্ৰিকেট অনুৰাগীৰ মাজত এই বিষয়টোৱে ডাঙৰ বিতৰ্কৰ জন্ম দিছে। প্ৰায় ২.৩৪ কোটি টকা খৰচ কৰি আব্ৰাৰক নিজৰ দলত অন্তৰ্ভুক্ত কৰাৰ পাছত ছানৰাইজাৰ্ছৰ এই সিদ্ধান্তক লৈ বহুতে ক্ষোভ প্ৰকাশ কৰিছে। বহু অনুৰাগীয়ে ছানৰাইজাৰ্ছৰ ব্ৰেণ্ড বৰ্জন কৰাৰ আহ্বান জনাই সামাজিক মাধ্যমত #ShameOnSRH আৰু #BoycottSunrisers হেচটেগ ব্যৱহাৰ কৰিছে।

এই প্ৰতিক্ৰিয়াৰ মূল কাৰণ হ’ল আব্ৰাৰ আহমেদে পূৰ্বতে নিজৰ সামাজিক মাধ্যমত কৰা কিছুমান বিতৰ্কিত পোষ্ট। অভিযোগ অনুসৰি, এই পোষ্টবোৰত ভাৰতীয় সশস্ত্ৰ বাহিনীক উপহাস কৰা হৈছিল, যিটো ভাৰতীয় অনুৰাগীয়ে সহজভাৱে ল’ব পৰা নাই। বহুতে প্ৰশ্ন তুলিছে যে ভাৰতীয় মালিকানাধীন এখন দলে কিদৰে দেশীয় আবেগক আওকাণ কৰি এনে এগৰাকী খেলুৱৈক চুক্তিবদ্ধ কৰিব পাৰে। ভাৰতীয় মালিকৰ দ্বাৰা পৰিচালিত দলসমূহে দীৰ্ঘদিন ধৰি পাকিস্তানী খেলুৱৈক এৰাই চলি অহাৰ পৰম্পৰা আছিল যদিও এইবাৰ সেই নীতি ভংগ হোৱাত অনুৰাগীসকল অধিক অসন্তুষ্ট হৈ পৰিছে।

ইপিনে, ক্ৰিকেটৰ দিশৰ পৰা চালে এই সিদ্ধান্তক ছানৰাইজাৰ্ছৰ বাবে এক ডাঙৰ কৌশল বুলি গণ্য কৰা হৈছে। আব্ৰাৰ বৰ্তমান বিশ্বৰ অন্যতম শ্ৰেষ্ঠ স্পিনাৰ হিচাপে পৰিগণিত হৈছে। দলৰ প্ৰশিক্ষক ডেনিয়েল ভেট্টৰীয়ে এই নিৰ্বাচন সম্পূৰ্ণভাৱে ক্ৰিকেটৰ দক্ষতাৰ ওপৰত ভিত্তি কৰি লোৱা বুলি দাবী কৰিছে। ইচিবিৰ নিয়ম অনুসৰি কোনো খেলুৱৈক জাতীয়তাৰ ভিত্তিত বাদ দিব নোৱাৰি, সেয়েহে এই চুক্তি কৰিবলৈ তেওঁলোক স্বতন্ত্ৰ আছিল।

অৱশ্যে, এই বিতৰ্কৰ মাজতে পুনৰবাৰ কলকাতা নাইট ৰাইডাৰ্ছৰ সৈতে মুস্তাফিজুৰ ৰহমানৰ ক্ষেত্ৰত ঘটা ঘটনাৰ কথা চৰ্চালৈ আহিছে। পূৰ্বতে বিচিচিআইৰ নিৰ্দেশত খেলুৱৈৰ চুক্তি বাতিল কৰিবলগীয়া হোৱাৰ দৰে ঘটনাৰ পিছত, ছানৰাইজাৰ্ছ লিডছেও আব্ৰাৰৰ চুক্তি বাহাল ৰাখিব নে নাই, সেয়া এতিয়া এক ডাঙৰ প্ৰশ্ন হৈ পৰিছে। ৰাজনৈতিক আৰু বাণিজ্যিক হেঁচাৰ সন্মুখত ফ্ৰেঞ্চাইজিটোৱে কি সিদ্ধান্ত লয়, সেয়াহে লক্ষণীয় হ’ব।