লেখাপানীত লোমহৰ্ষক হত্যাকাণ্ড, পত্নীক হত্যা কৰি পুতি ৰাখিলে শৌচাগাৰৰ গাতত
তিনিচুকীয়া জিলাৰ লেখাপানী থানাৰ অন্তৰ্গত কৰিয়া জানত আজি সংঘটিত এক লোমহৰ্ষক হত্যাকাণ্ডই অঞ্চলটোত তীব্ৰ চাঞ্চল্যৰ সৃষ্টি কৰিছে।
প্ৰাপ্ত খবৰ অনুযায়ী, তিনিচুকীয়া জিলাৰ লেখাপানী আৰক্ষীৰ থানাৰ অধীনৰ কৰিয়াপানীৰ বাসিন্দা মিত্ৰ প্ৰসাদ শৰ্মাই তেওঁৰ পত্নী ভোমা কুমাৰী শৰ্মাৰ সৈতে কিবা পাৰিবাৰিক কাৰণত কাজিয়াত লিপ্ত হৈছিল। কিন্তু শেষত কাজিয়াই এনে চৰম অৱস্থা পায় যে লোকজনে ঘৈণীয়েকক হত্যা কৰি শৌচাগাৰৰ গাতত পুতি থয়।
আনহাতে, বহুত সময় মাকক ঘৰত বিচাৰি নাপায় শৰ্মাৰ জীয়েকে মাক ক’ত গ’ল বুলি প্ৰশ্ন কৰাত শৰ্মাই ঘৰত কাজিয়া লগাৰ বাবে মাক ক’ৰবালৈ ওলাই গ’ল বুলি জীয়েকক পতিয়ন নিয়াবলৈ চেষ্টা কৰিছিল যদিও ঘৰৰ পিছফালৰ পাইখানাৰ গাঁতত মাকৰ মৃতদেহ প্ৰত্যক্ষ কৰাত হুৱাদুৱা লাগে আৰু লেখাপানী আৰক্ষীক খবৰ দিয়াত লেখাপানী আৰক্ষী ঘটনাস্থলীত উপস্থিত হৈ নিত্যাপ্ৰসাদক আটক কৰি থানালৈ লৈ আহে।
তিনিটা সন্তানৰ পিতৃ মিত্ৰ প্ৰসাদে কিয় এই অমানৱীয় হত্যাকাণ্ড সংঘটিত কৰিলে সেই কথা বাতৰি লিখা সময়লৈকে জানিব পৰা হোৱা নাই। অৱশ্যে, ইতিমধ্যে লেখাপানী আৰক্ষীয়ে থানাত এক গোচৰ ৰুজু কৰি হত্যাকাৰীক জেৰা অব্যাহত ৰাখিছে।