শিখ নেতা হৰদীপ সিং নিজ্জৰ হত্যাকাণ্ডত জড়িত থকাৰ সন্দেহত কানাডাত গ্ৰেপ্তাৰ ৩ ভাৰতীয়

খালিস্তানপন্থী শিখ নেতা হৰদীপ সিং নিজ্জৰৰ হত্যাকাণ্ডৰ সৈতে জড়িত থকাৰ সন্দেহত কানাডাৰ আলবাৰ্টা প্ৰদেশৰ এডমন্টন চহৰৰ পৰা তিনিজন লোকক গ্ৰেপ্তাৰ কৰিছে কানাডাৰ আৰক্ষীয়ে।

বিবিচিৰ বাতৰি অনুসৰি, শুকুৰবাৰে (৩ মে’) দেশখনৰ আৰক্ষী অধীক্ষক মনদ্বীপ মুকাৰে কয় যে গ্ৰেপ্তাৰ হোৱা তিনিজন লোক হৈছে কৰণ ব্ৰাৰ (২২), কমল প্ৰীত সিং (২২) আৰু কৰণ প্ৰীত সিং (২৮)।

তেওঁলোক আটাইকেইজনেই এডমন্টনৰ বাসিন্দা আৰু ভাৰতীয়। তেওঁলোকৰ বিৰুদ্ধে হত্যাৰ অভিযোগ উত্থাপন কৰা হৈছে।

তেওঁ লগতে হত্যাকাণ্ডৰ তদন্ত অব্যাহত আছে বুলিও কয়। এই তিনিজনৰ বাহিৰেও হয়তো আন বহু লোক এই হত্যাকাণ্ডৰ লগত জড়িত হ’ব পাৰে। সেয়েহে গ্ৰেপ্তাৰৰ সংখ্যা বৃদ্ধি পাব পাৰে আৰু তেওঁলোকৰ বিৰুদ্ধে অভিযোগ উত্থাপন হ’ব পাৰে।  

যোৱা বছৰৰ জুন মাহত কানাডাৰ ভেংকুৱাৰৰ সমীপত ৪৫ বছৰীয়া হৰদীপ সিং নিজ্জৰক গুলীয়াই হত্যা কৰা হৈছিল। নিজ্জৰৰ নিকট লোকসকলে কয় যে কানাডাৰ চোৰাংচোৱা বিভাগে নিজ্জৰক হত্যাকাণ্ডৰ বিষয়ে আগতীয়াকৈ সকীয়াই দিছিল।

কানাডাৰ প্ৰধানমন্ত্ৰী জাষ্টিন ট্ৰুডোৱে ভাৰতীয় চোৰাংচোৱা সংস্থাৰ বিৰুদ্ধে হত্যাৰ অভিযোগ উত্থাপন কৰিছে। তেওঁৰ অভিযোগৰ পিছতে দুয়োখন দেশৰ মাজত কূটনৈতিক অস্থিৰতাৰ সৃষ্টি হয়।