কাজিৰঙা ৰাষ্ট্ৰীয় উদ্যানৰ কহঁৰা বনাঞ্চলৰ মৰি ডিফলু নদীত গুলী উদ্ধাৰ

কাজিৰঙা ৰাষ্ট্ৰীয় উদ্যানৰ কহঁৰা বনাঞ্চলৰ ২ নং কহঁৰাত বুধবাৰে বিয়লি মৰি ডিফলু নদীৰ পৰা ৩৹৩ ৰাইফলৰ ১২ জাঁই সক্ৰিয় গুলী উদ্ধাৰ কৰে বনৰক্ষী বাহিনীয়ে৷

২ নং কহঁৰাৰ অনন্ত গনক নামৰ ব্যক্তি জনৰ ছোৱালী জনীয়ে মৰি ডিফলু নদীত গা ধুবলৈ গৈ পানীত নামোতেই ভৰিত লাগে কাপোৰেৰে মেৰিয়াই থোৱা ১২ জাঁই গুলীৰ টোপোলাটো ৷

গুলীৰ টোপোলাটে দেখি কিশোৰী গৰাকীয়ে মাতৃক কথাতো অৱগত কৰাত পৰিয়ালৰ লোকে  গুলীৰ টোপোলাটোৰ বিষয়ে বন বিভাগক জনায় ৷

খবৰ পোৱাৰ লগে লগেই বনাঞ্চলিক বিষয়া চেলিম আহমেদে কহঁৰাৰ আৰক্ষী সহ ঘটনাস্থলীত উপস্থিত হৈ নদীৰ পৰা গুলী খিনি উদ্ধাৰ কৰে৷

বন বিভাগৰ মতে চোৰাং চিকাৰীয়ে ৰাষ্ট্ৰীয় উদ্যানত গঁড় হত্যাৰ পৰিকল্পনাৰেই পানীৰ তলত গুলী খিনি লুকুৱাই থৈছিল ৷ গুলী উদ্ধাৰৰ পাচত অধিক তথ্যৰ বাবে ঘটনাৰ সন্দৰ্ভত বন আৰু আৰক্ষী বিভাগে তদন্ত আৰম্ভ কৰিছে ৷