৫০ গৰাকী শিশুক যৌন উৎপীড়ন চলাই CBI-ৰ হাতত গ্ৰেপ্তাৰ কনিষ্ঠ অভিযন্তা

উত্তৰ প্ৰদেশৰ এজন কনিষ্ঠ অভিযন্তাৰ কু-কৰ্ম। অভিযন্তাগৰাকীয়ে সৰু শিশুৰ সৈতে যৌন সম্ভোগ কৰি ফটো তথা ভিডিঅ’সমূহ ডাৰ্ক ৱেবচাইটত বিক্ৰী কৰি দিয়ে।

তেওঁ এক-দুই নহয় দহ বছৰ ধৰি এই জঘন্য কাৰ্যকলাপ চলাই আহিছিল আৰু অৱশেষত চিবিআইৰ হাতত ধৰা পৰে।

জানিব পৰা গৈছে যে, অভিযুক্ত ৰামভৱান উত্তৰ প্ৰদেশৰ জলসিঞ্চন বিভাগত কৰ্মৰত। তেওঁ সদায় ৫ বছৰৰ পৰা ১৬ বছৰৰ শিশুক লক্ষ্য কৰি লৈছিল।

অভিযন্তাগৰাকীয়ে দেশ আৰু বিদেশৰ বিকৃত মানসিকতাৰ লোকৰ মাজত ভিডিঅ’ আৰু ছবিসমূহ বিক্ৰী কৰিছিল।

চিবিআইয়ে জানিব পৰা অনুসৰি তেওঁ যোৱা দহ বছৰত ৫০টা শিশুক যৌন উৎপীড়ন চলাইছে।

ছিত্ৰকুট জিলাৰ বাসিন্দা ৰামভৱানে মুখ্যতঃ ছিত্ৰকুট, বান্দা আৰু হামিৰপুৰত কাম কৰি আছিল।

তেওঁক বান্দাৰ পৰা আটক কৰা হৈছিল। তেওঁৰ পৰা চিবিআইৰ দলে ৮টা মোবাইল ফোন, আঠ লাখ টকা, লেপটপ, যৌন খেলনা আদি উদ্ধাৰ কৰে।

তেওঁৰ পৰা বৃহৎ সংখ্যক শিশু পৰ্ণগ্ৰাফীও উদ্ধাৰ কৰা হৈছে।

চিবিআইৰ মুখপাত্ৰ আৰ কে গৌৰে কৈছিল যে অভিযুক্তজনে কেৱল শিশুক যৌন উৎপীড়ন কৰাই নহয়, এই সমূহ ৰেকৰ্ডিঙো কৰি ৰাখিছিল।

ইয়াৰ পিছত সেই সমূহ ডাৰ্কৱেবত বিক্ৰী কৰে।

উল্লেখ্য যে নিৰ্দিষ্ট তথ্য প্ৰাপ্ত কৰাৰ পিছত চিবিআইৰ বিশেষ অনলাইন শিশু যৌন উৎপীড়ন আৰু শোষণ প্ৰতিৰোধ (অ’চিএছএই) কোষে কুখ্যাত অপৰাধীজনক আটক কৰে।