হাজেলাক বদলিৰ বাবে সময় বিচাৰি উচ্চতম ন্যায়ালয়ৰ দ্বাৰস্থ কেন্দ্ৰ

ৰাষ্ট্ৰীয় নাগৰিকপঞ্জীৰ ৰাজ্যিক সমন্বয়ক প্ৰতীক হাজেলাক উচ্চতম ন্যায়ালয়ে মধ্যপ্ৰদেশলৈ বদলিৰ নিৰ্দেশ দিয়াৰ পাছত বদলিৰ প্ৰয়োজনীয় আনুষ্ঠানিকতা সম্পূৰ্ণ কৰাৰ বাবে সময় বিচাৰি বৃহস্পতিবাৰে উচ্চতম ন্যায়ালয়ৰ ওচৰ চাপিছে কেন্দ্ৰ চৰকাৰ।

কেন্দ্ৰৰ উকীলে উচ্চতম ন্যায়ালয়ক চৰকাৰে ১৯৯৫ বৰ্ষৰ অসম-মেঘালয় কেডাৰৰ আই এ আছ বিষয়া গৰাকীক বদলিৰ বাবে পদক্ষেপ লোৱা বুলি উল্লেখ কৰি প্ৰয়োজনীয় আনুষ্ঠানিকতা সম্পূৰ্ণ কৰাৰ বাবে কিছু সময় বিচাৰে।

উচ্চতম ন্যায়ালয়ে ১৮ অক্টোবৰত কেন্দ্ৰ চৰকাৰক সাত দিনৰ ভিতৰত প্ৰতীক হাজেলাক তেওঁৰ গৃহৰাজ্য মধ্য প্ৰদেশলৈ বদলিৰ বাবে নিৰ্দেশ দিছিল।

মুখ্য ন্যায়াধীশ ৰঞ্জন গগৈ, ন্যায়াধীশ এছ এ বোবদে আৰু ন্যায়াধীশ এছ এ নাজিৰেৰে গঠিত উচ্চতম ন্যায়ালয়ৰ তিনিজনীয়া বিচাৰপীঠে কেন্দ্ৰক আবেদন দাখিল কৰাৰ বাবে কয়।

উচ্চতম ন্যায়ালয়ে প্ৰতীক হাজেলাক অসমৰ ৰাষ্ট্ৰীয় নাগৰিকপঞ্জী উন্নীতকৰণ প্ৰক্ৰিয়াৰ ৰাজ্যিক সমন্বয়ক হিচাপে নিযুক্তি দিছিল।

যদিও উচ্চতম ন্যায়ালয়ে হাজেলাক বদলিকৰণৰ কোনো কাৰণ উল্লেখ কৰা নাই যদিও এন আৰ চি তালিকা প্ৰকাশৰ পাছত তেওঁ লাভ কৰা ভাবুকিকে ইয়াৰ মূল কাৰণ হিচাপে ধাৰণা কৰা হৈছে।

ন্যায়ালয়ে হাজেলাক সম্ভাব্য অধিকতম সময়ৰ বাবে ডেপুটেশ্যনত ‘ইণ্টাৰ-কেডাৰ’ত গৃহ ৰাজ্যলৈ বদলিৰ নিৰ্দেশ দিছিল।