কৰ’নাৰ পৰীক্ষাৰ বাবে ইচ্ছানুসৰি পইচা ল’ব নোৱাৰিব ব্যক্তিগত হাস্পাতালে!

কৰ’না ভাইৰাছৰ সংক্ৰমণৰ মাজতে ব্যক্তিগত হাস্পাতলত ইয়াৰ পৰীক্ষা কৰাটো এটা ডাঙৰ সমস্যা।

ব্যক্তিগত হাস্পাতল তথা নাৰ্চিংহ’মত কৰ’নাৰ পৰীক্ষাৰ ফীজ ইমান বেছি যে সাধাৰণ লোকৰ বাবে যথেষ্ট চিন্তাৰ বিষয়।

এই সমস্যাৰ সমাধান কৰিবলৈ আগবাঢ়িছে চৰকাৰে। কেন্দ্ৰীয় চৰকাৰে শীঘ্ৰেই ব্যক্তিগত হাস্পাতলত কৰ’না পৰীক্ষাৰ ফীজ নিৰ্দ্ধাৰণ কৰিব।

কেন্দ্ৰীয় চৰকাৰে গঠন কৰি দিয়া বি কে পাল কমিটিয়ে কৰ’না ভাইৰাছৰ পৰীক্ষাৰ ফীজ হ্ৰাস কৰিবলৈ তেওঁলোকৰ শেহতীয়া প্ৰতিবেদনত পৰামৰ্শ আগবঢ়াইছে।

কমিটিয়ে গৃহ মন্ত্ৰ্যালয়ক দাখিল কৰা প্ৰতিবেদনত কয় যে কৰ’না পৰীক্ষাৰ ফীজ বহুত বেছি আৰু ইয়াৰ এক তৃতীয়াংশ হ্ৰাস কৰা উচিত।

বাতৰি অনুসৰি, কমিটিখনৰ এই পৰামৰ্শ গৃহ মন্ত্ৰ্যালয়ে বিবেচনা কৰি আছে। মন্ত্ৰ্যালয়ে শীঘ্ৰেই গোটেই দেশতে মহামাৰী আইনৰ অধীনত ব্যক্তিগত হাস্পাতলৰ বাবে এক নিৰ্দিষ্ট মৃল্যৰ কৰ’নাৰ পৰীক্ষাৰ নিৰ্দেশ দিয়াৰ সম্ভাৱনা আছে।

উল্লেখ্য যে ব্যক্তিগত হাস্পাতলত কৰ’না পৰীক্ষাৰ ক্ষেত্ৰত দিল্লী আৰু উত্তৰ প্ৰদেশ চৰকাৰে ইতিমধ্যে মূল্য নিৰ্দ্ধাৰণ কৰি দিছে।

সেই অনুসৰি, দিল্লীত ব্যক্তিগত হাস্পাতালে ২৪০০টকাত কৰ’নাৰ পৰীক্ষা কৰিব লাগিব। আনহাতে, উত্তৰ প্ৰদেশ চৰকাৰে ব্যক্তিগত হাস্পাতলসমূহক কৰ’না পৰীক্ষাৰ বাবে ২৫০০টকাৰ ওপৰত ল’ব নোৱাৰিব বুলি নিৰ্দেশনা জাৰি কৰিছে।