আমেৰিকাৰ এখন বিশ্ববিদ্যালয়ৰ অনুষ্ঠাত ভাষণ দি থাকোতে গুলীয়াই হত্যা ট্ৰাম্পৰ ঘনিষ্ঠ সহযোগী চাৰ্লি কাৰ্কক
বুধবাৰে আমেৰিকাৰ ইউটা ভেলী বিশ্ববিদ্যালয়ত ছাত্ৰ-ছাত্ৰীৰ সমাৱেশত ভাষণ দি থকাৰ সময়ত ৰাষ্ট্ৰপতি ড’নাল্ড ট্ৰাম্পৰ ঘনিষ্ঠ সহযোগী চাৰ্লি কাৰ্কক গুলীয়াই হত্যা কৰা হয়। টাৰ্নিং পইণ্ট ইউ এছ এৰ প্ৰতিষ্ঠাপক কাৰ্কৰ ডিঙিত গুলী বিদ্ধ হোৱাৰ পিছতে তেওঁৰ মৃত্যু হয়। ৰাষ্ট্ৰপতি ট্ৰাম্পে তেওঁৰ সামাজিক মাধ্যমত ঘনিষ্ঠ সহযোগী চাৰ্লি কাৰ্কৰ মৃত্যুত শোক প্ৰকাশ কৰিছে।
হোৱাইট হাউছে সদৰী কৰা মতে ট্ৰাম্পে চাৰ্লি কাৰ্কৰ সন্মানত আমেৰিকাৰ সকলো পতাকা অৰ্ধনমিত ৰাখিবলৈ নিৰ্দেশ দিছে। বিশ্ববিদ্যালয়ৰ মুখপাত্ৰৰ মতে, কাৰ্কে ভাষণ আৰম্ভ কৰাৰ প্ৰায় ২০ মিনিটৰ পিছত ওচৰৰ এটা অট্টালিকাৰ পৰা গুলীৰ শব্দ শুনা যায়। ভিডিঅ’ত দেখা গৈছে যে গুলী লাগি কাৰ্ক তললৈ পৰি যায়। এফবিআইৰ সঞ্চালক কাশ পেটেলে জানাইছে যে তদন্ত চলি আছে, আৰু প্ৰাৰম্ভিকভাৱে এজন সন্দেহজনকক আটক কৰা হৈছিল যদিও পিছত মুকলি কৰা হয়।
৩১ বছৰীয়া চাৰ্লি কাৰ্ক আছিল এজন প্ৰভাৱশালী ৰক্ষণশীল কৰ্মী আৰু টাৰ্নিং পইণ্ট ইউ এছ এৰ প্ৰতিষ্ঠাপক। ২০১২ চনত মাত্ৰ ১৮ বছৰ বয়সত তেওঁ এই সংগঠন প্ৰতিষ্ঠা কৰি হাইস্কুল আৰু কলেজত ৰক্ষণশীল ৰাজনীতিৰ প্ৰচাৰ কৰিছিল। ২০২৪ চনৰ ৰিপাব্লিকান নেচনেল কনভেনচনত তেওঁ যুৱসমাজৰ বিষয়ে গুৰুত্বপূৰ্ণ ভাষণ দিছিল। এই হত্যাকাণ্ডৰ পিছত ট্ৰাম্পৰ লগতে উপ-ৰাষ্ট্ৰপতি জে ডি ভান্স, এফবিআইৰ সঞ্চালক আৰু অন্যান্য নেতাসকলে শোক প্ৰকাশ কৰিছে।