বান আক্ৰান্ত দক্ষিণ শালমাৰাৰ ভাৰত-বাংলাদেশ সীমান্ত পৰিদৰ্শন মুখ্য মন্ত্ৰী সৰ্বানন্দ সোণোৱালৰ

মুখ্য মন্ত্ৰী সৰ্বানন্দ সোণোৱালে আজি দক্ষিণ শালমাৰা মানকাছাৰ জিলাৰ আলগা, শিশুমাৰা বি অ’ পি পৰিদৰ্শন কৰি সাম্প্ৰতিক বানত ক্ষতিগ্ৰস্ত সীমান্ত পৰিদৰ্শন কৰি তাত নিয়োজিত সীমান্ত সুৰক্ষা বাহিনীৰ বিষয়া-জোৱান সকলৰ লগতে স্থানীয় জনসাধাৰণৰ সৈতে মত-বিনিময় কৰ।

সোণোৱালে বানপানীৰ সময়ছোৱাত সীমান্ত সুৰক্ষা বাহিনীক অহৰ্নিশে সীমান্ত নিৰীক্ষণৰ ব্যৱস্থা শক্তিশালী কৰিবলৈ কয়।

সীমান্তত জেনেৰেটৰ চলাই হ’লেও নিশাৰ ভাগত উপযুক্ত পোহৰৰ ব্যৱস্থা কৰিবলৈ সীমান্ত সুৰক্ষা বাহিনীক কোৱাৰ উপৰিও সীমান্তৰ নিৰাপত্তাৰ লগতে সীমান্তৰে হ’ব পৰা সম্ভাব্য চোৰাং কাৰবাৰ প্ৰতিৰোধ কৰাৰ দিশতো সষ্টম হৈ থকাৰ বাবে কয় মুখ্য মন্ত্ৰী সোণোৱালে।

সীমান্ত পৰিদৰ্শনৰ সময়ত বিধায়ক ডা০ ৰণোজ পেগু, বি এছ এফৰ ০৬ বেটেলিয়নৰ কামাণ্ডেণ্ট, ডি আই  জি ৰৌণক আলি হাজৰিকা আৰু জিলা উপায়ুক্ত, আৰক্ষী অধীক্ষক প্ৰমুখ্যে অন্যান্য শীৰ্ষ বিষয়া সকল উপস্থিত থাকে।

সীমান্ত পৰিদৰ্শন কৰি সোণোৱালে হাটশিঙিমাৰীত থকা উপায়ুক্তৰ কাৰ্যালয়ৰ সভাকক্ষত দক্ষিণ শালমাৰা মানকাছাৰ জিলাৰ সাম্প্ৰতিক বান পৰিস্থিতিৰ এক পৰ্যালোচনা মূলক বৈঠকত অংশ গ্ৰহণ কৰে।

বৈঠকত প্ৰথমতে মানকাছাৰ জিলাৰ উপায়ুক্তই জিলাখনৰ ক্ষয়-ক্ষতিৰ সৱিশেষ সামৰি বিষদভাৱে প্ৰতিবেদন দাঙি ধৰে।

বৈঠকত অধ্যক্ষতা কৰি সোণোৱালে বানাক্ৰান্ত জনসাধাৰণলৈ জিলা প্ৰশাসনৰ তৰফৰ পৰা কেনেধৰণৰ বান সাহায্য আগবঢ়োৱা হৈছে ইয়াৰ সবিশেষ বুজ লয়।

মুখ্য মন্ত্ৰীয়ে প্ৰতিগৰাকী বানাক্ৰান্তই যাতে সকলো ধৰণৰ চৰকাৰী সাহায্য সময়মতে লাভ কৰে সেইটো নিশ্চিত কৰাৰ বাবে জিলা উপায়ুক্তক নিৰ্দেশ দিয়াৰ লগতে জনস্বাস্থ্য কাৰিকৰী বিভাগক বানাক্ৰান্ত জনসাধাৰণলৈ বিশুদ্ধ খোৱাপানী যোগান ধৰিবলৈ নিৰ্দেশ দিয়ে।

মুখ্য মন্ত্ৰীয়ে তাৰোপৰি বানপানীৰ পাছতে কৃষকৰ বাবে কঠিয়া, পশুৰ বাবে উপযুক্ত খাদ্য, বানপানীৰ সময়ত যাতে বিদ্যুৎস্পৃষ্ট হৈ কোনো দুৰ্ঘটনা সংঘটিত নহয় তাৰ বাবে ব্যৱস্থা গ্ৰহণৰ নিৰ্দেশ দিয়ে।