পাইনেপ’ল চেলেঞ্জ! ‘আনাৰস যুদ্ধ’ত মুখামুখি চীন আৰু তাইৱান
চীন আৰু তাইৱানৰ মাজত সংঘাত বহু পুৰণি। মাজে মাজে দুয়োখন দেশৰ মাজত পুৰণি ঘা খজুৱাই লোৱাৰ প্ৰৱণতা এটাই উক দি থাকে।
ইয়াৰ মাজতে যোৱা মাহত তাইৱানৰ আনাৰসৰ আমদানিৰ ওপৰত নিষেধাজ্ঞা জাৰি কৰে চীনে।
চীনে দাবী কৰা মতে, তাইৱানৰ আনাৰসত এবিধ ‘ক্ষতিকাৰক পোক’ আছে যিয়ে তেওঁলোকৰ নিজস্ব উৎপাদনক ক্ষতিগ্ৰস্ত কৰিব পাৰে।
ইপিনে, তাইৱানে ইয়াৰ প্ৰতিক্ৰিয়া প্ৰকাশ কৰি কৈছে যে ইয়াৰ সৈতে উৎপাদিত ফলৰ পোকৰ কোনো যোগসূত্ৰ নাই।
উল্লেখ্য যে চীনে সদায় তাইৱানক তেওঁলোকৰ এখন প্ৰদেশ হিচাপে বিবেচনা কৰি আহিছে। সেইদৰে নতুনকৈ এনে বাণিজ্যিক যুদ্ধৰ জৰিয়তে তাত ৰাজনৈতিক চাপ বৃদ্ধি কৰিবলৈ প্ৰয়াস চলাইছে।
আনহাতে, তাইৱানে তেওঁলোকৰ উৎপাদিত আনাৰস ৰপ্তানিৰ বাবে নতুন গ্ৰাহকৰ সন্ধান কৰিছে। চীনে নিষিদ্ধ কৰা এই ফলবিধ দেশৰ জনসাধাৰণক অধিক পৰিমানে খোৱাৰ বাবেও উৎসাহিত কৰিছে।
দেশৰ ভিতৰত আনাৰসৰ বিক্ৰী বৃদ্ধি কৰি তোলাৰ বাবে তাইৱানৰ প্ৰেছিডেন্ট ছাই ইং ৱেনে ছচিয়েল মিডিয়াৰ জৰিয়তে এক ‘পাইনেপ’ল চেলেঞ্জ’ মুকলি কৰিছে।
আনহাতে, দেশখনৰ ভাইচ প্ৰেছিডেন্ট লাই ছিং তে-ই এক টুইটত লিখিছে,’’তাইৱানৰ আনাৰস যুঁজাৰু বিমানতকৈয়ো শক্তিশালী। ভূ-ৰাজনৈতিক চাপে ইয়াৰ সোৱাদ হ্ৰাস কৰিব নোৱাৰে।‘’