জুবিন গাৰ্গৰ মৃত্যুৰ তদন্ত! নিশিতা গোস্বামী, শেখৰ গোস্বামী আৰু অমৃতপ্ৰভাক চি আই ডিৰ তলব

কিংবদন্তি সংগীত শিল্পী জুবিন গাৰ্গৰ অকাল মৃত্যুৰ তদন্তৰ বাবে অভিনেত্ৰী নিশিতা গোস্বামী, কণ্ঠশিল্পী অমৃতপ্ৰভা মহন্ত আৰু বাদ্যযন্ত্ৰী শেখৰ গোস্বামীক শনিবাৰে (২৭ ছেপ্টেম্বৰ) পুৱা ১১ বজাত চিআইডিৰ গুৱাহাটীস্থিত মুখ্য কাৰ্যালয়ত জেৰাৰ বাবে মাতি অনা হৈছে।

বাতৰি অনুসৰি, জুবিনৰ ছিংগাপুৰ ভ্ৰমণৰ পৰিস্থিতি আৰু তাৰ পিছত হোৱা মৰ্মান্তিক কাণ্ডৰ সন্দৰ্ভত গুৰুত্বপূৰ্ণ তথ্যা দিবলৈ তিনিওজনক মাতি অনা হৈছে।

উল্লেখ্য যে যিটো সাংস্কৃতিক অনুষ্ঠানত জুবিনে তেওঁৰ আকস্মিক মৃত্যুৰ পূৰ্বে অংশগ্ৰহণ কৰিছিল, সেই নৰ্থ ইষ্ট ইণ্ডিয়া ফেষ্টিভেল (এন ই আই এফ)ত অংশগ্ৰহণৰ বাবে নিশিতা গোস্বামীও ছিংগাপুৰলৈ গৈছিল।

ইপিনে, পূৰ্বে আটক কৰা আৰু পিছত অসম আৰক্ষীয়ে মুকলি কৰি দিয়া শেখৰ গোস্বামীক আকৌ এবাৰ অধিক জেৰাৰ বাবে হাজিৰ হ’বলৈ নিৰ্দেশ দিয়া হৈছে।

সেইদৰে, নৰ্থইষ্ট ফেষ্টিভেলৰ বাবে ছিংগাপুৰলৈ যোৱা জুবিনৰ সহযোগী কণ্ঠশিল্পী অমৃতপ্ৰভাকো ঘটনা সন্দৰ্ভত সোধা-পোছাৰ বাবে মাতি অনা হৈছে।

বিতৰ্কিত সাংস্কৃতিক উদ্যোগী শ্যামকানু মহন্তই আয়োজন কৰা এই অনুষ্ঠানটো শোকাৱহ দুৰ্ঘটনাৰ পিছতে তদন্তৰ আওতালৈ আহিছে। ছিংগাপুৰ ভ্ৰমণৰ সময়ত জুবিনৰ পৰ্যাপ্ত যত্ন লোৱা হোৱা নাছিল বুলি অভিযোগ উত্থাপন হৈছে।

সমগ্ৰ অসমৰ অনুৰাগী আৰু শুভাকাংক্ষীসকলে অভিযোগ কৰে যে মহন্ত আৰু জুবিনৰ মেনেজাৰ সিদ্ধাৰ্থ শৰ্মাকে ধৰি সাংস্কৃতিক অনুষ্ঠানটোৰ আয়োজকসকলে শিল্পীগৰাকীৰ স্বাস্থ্য আৰু যত্নৰ পৰিৱৰ্তে লাভক অগ্ৰাধিকাৰ দিছিল।

ৰাইজৰ ব্যাপক ক্ষোভৰ উদ্গীৰণ দেখি অসম চৰকাৰে ইতিমধ্যে মহন্তক ৰাজ্যত সাংস্কৃতিক অনুষ্ঠান আয়োজন কৰাত নিষেধাজ্ঞা আৰোপ কৰিছে।