‘জুইৰ লগত খেলিলে আঙুলি পুৰিব’, দেশৰ ধনী-ক্ষমতাশালী মহলক সকীয়নি সৰ্বোচ্চ ন্যায়ালয়ৰ

মুখ্য ন্যায়াধীশ ৰঞ্জন গগৈৰ বিৰুদ্ধে উত্থাপিত যৌন নিৰ্য্যাতনৰ অভিযোগৰ ন্যায়িক দিশ বিচাৰ কৰি থকা তিনিজনীয়া বিশেষ বিচাৰপীঠে বৃহস্পতিবাৰে দেশৰ ধনৱান আৰু শক্তিশালী মহললৈ বুলি কঠোৰ সাৱধানবাণী প্ৰেৰণ কৰিছে।

“যোৱা তিনি, চাৰি বছৰত অনুষ্ঠানটো (সৰ্বোচ্চ ন্যায়ালয়)ক যিধৰণে ব্যৱহাৰ কৰা হৈছে, ই মৰি যাব। এটা প্ৰণালীবদ্ধ চেষ্টা/ খেল চলিছে।…..দেশৰ ধনৱান আৰু ক্ষমতাশালীসকলক কোৱাৰ সময় আহি গৈছে যে জুইৰ লগত খেলিলে তেওঁলোকৰে আঙুলি পুৰিব,” এয়া বৃহস্পতিবাৰৰ শুনানিত সৰ্বোচ্চ ন্যায়ালয়ৰ সকীয়নি।

ন্যায়াধীশ অৰুণ মিশ্ৰ, ন্যাঃ ৰহিন্তন ফলি নৰিমন আৰু ন্যাঃ দীপক গুপ্তাৰ তিনিজনীয়া বিচাৰপীঠখনে ন্যায়পালিকাৰ ওপৰত হোৱা “ব্যৱস্থাগত আক্ৰমণ” আৰু সৰ্বোচ্চ আদালতক “প্ৰভাৱিত” কৰিব খোজাসকলক সাৱধান কৰি দিছে।

“আমি দেশৰ ধনী আৰু ক্ষমতাশালীসকলক সৰ্বোচ্চ ন্যায়ালয়ক নিয়ন্ত্ৰণ কৰিব খোজাৰ পৰা বিৰত থাকিবলৈ ক’ব লগা হৈছে,” বিচাৰপীঠখনৰ মন্তব্য। ন্যায়াধীশ এচ এ’ ববদেই এই বিশেষ বিচাৰপীঠখন গঠন কৰি দিছিল।

লগতে পঢ়ক– তিনিজনীয়া সমিতিয়ে শুনিব মুখ্য ন্যায়াধীশৰ বিৰুদ্ধে অভিযোগ

এই “প্ৰণালীবদ্ধ আক্ৰমণ”ৰ বিৰুদ্ধে ব্যৱস্থাগ্ৰহণৰ সময় আহি গৈছে বুলিও বিচাৰপীঠখনে মন্তব্য কৰিছে।

অধিবক্তা উৎসৱ বেইনছে সৰ্বোচ্চ ন্যায়ালয়ত বুধবাৰে দাখিল কৰা শপতনামাত জেট এয়েৰৱেইজৰ মুৰব্বী নৰেশ গ’ৱেলৰ লগতে দাউদ ইব্ৰাহিমৰ নাম আছিল।

মুখ্য ন্যায়াধীশৰ বিৰুদ্ধে যৌন নিৰ্য্যাতনৰ “ষড়যন্ত্ৰ” কৰাৰ বাবে তেওঁক ১.৫ কোটি টকা আগবঢ়োৱা হৈছিল বুলি অধিবক্তা উৎসৱ বেইনছে দাখিল কৰা শপতনামাৰ শুনানি লৈ এইসমূহ মন্তব্য কৰিছে সৰ্বোচ্চ ন্যায়ালয়খনে।

মুখ্য ন্যায়াধীশ ৰঞ্জন গগৈৰ বিৰুদ্ধে উত্থাপিত “বৃহৎ ষড়যন্ত্ৰ” আৰু ন্যায়াধীশৰ “ফিক্সিং” সন্দৰ্ভত তদন্ত কৰাৰ বাবে উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ এ কে পাটনায়কক লৈ এখন এজনীয়া সমিতিও বিচাৰপীঠখনে গঠন কৰি দিছে।

ন্যায়াধীশ এ কে পাটনায়ক সমিতিয়ে অৱশ্যে মুখ্য ন্যায়াধীশ ৰঞ্জন গগৈৰ বিৰুদ্ধে উত্থাপিত যৌন নিৰ্য্যাতনৰ অভিযোগৰ তদন্ত নকৰে।