হাজেলাক অব্যাহতিৰ প্ৰতিক্ৰিয়া কৰিবলৈ গৈ মুখ্য ন্যায়াধীশ ৰঞ্জন গগৈক চোৰৰ ৰক্ষক সজালে বিজেপিৰ মুখপাত্ৰই

এন আৰ চিৰ ৰাজ্যিক সমন্বয়ক প্ৰতীক হাজেলাক আজি উচ্চতম ন্যায়ালয়ে এন আৰ চিৰ দায়িত্বৰ পৰা অব্যাহতি দিয়া আৰু মধ্য প্ৰদেশলৈ বদলিৰ নিৰ্দেশ দিয়াৰ পাছতে ইয়াৰ প্ৰতিক্ৰিয়া কৰিবলৈ গৈ বহুতে ধৃষ্টতাৰ সীমা চেৰাই যোৱা দেখা গৈছে।

শীৰ্ষ আদালতখনৰ এই সিদ্ধান্তক একাংশই চৰকাৰৰ অভিসন্ধি আখ্যা দিয়াৰ বিপৰীতে আন একাংশই হাজেলাক আক্ৰমণ কৰাৰ চলেৰে দেশৰ মুখ্য ন্যায়াধীশ ৰঞ্জন গগৈকো তীব্ৰ বাক্যবাণেৰে আক্ৰমণ কৰা দেখা গৈছে।

নিজৰ প্ৰতিক্ৰিয়াত মুখ্য ন্যায়াধীশ ৰঞ্জন গগৈলৈ সন্দেহৰ আঙুলি তুলি ধৃষ্টতা দেখুৱায় ৰাজ্যিক বিজেপিৰ মুখপাত্ৰ মুমিনুল আৱাল আৰু আছাম পাব্লিক ৱৰ্কছৰ সভাপতি অভিজিৎ শৰ্মাই। আনকি হাজেলাক ‘চোৰ’ আখ্যা দি মুখ্য ন্যায়াধীশজনক ‘চোৰৰ সুৰক্ষক’ সজালে মুমিনুল আৱালে।

ইপিনে, যোৱা ৩ বছৰে হাজেলাক বাৰম্বাৰ আক্ৰমণ কৰি অহা হোজাই সমষ্টিৰ বিতৰ্কিত বিজেপি বিধায়ক শিলাদিত্য দেব পুনৰবাৰ সৰৱ হয়।

তলত অসম্পাদিত ৰূপত তিনিওগৰাকীৰে প্ৰতিক্ৰিয়া তুলি দিয়া হ’ল-

মমিনুল আৱাল, ৰাজ্যিক বিজেপিৰ মুখপাত্ৰ

চোৰ পলাইছে আৰু উচ্চতম ন্যায়ালয়ৰ ৰঞ্জন গগৈয়ে চোৰক সুৰক্ষা দিবলৈ এই প্ৰক্ৰিয়াটো কৰিছে। প্ৰতীক হাজেলাৰ ওপৰত ইমানবোৰ অভিযোগ আছিল, টকা-পইচাৰ হেৰ-ফেৰ। কোনোবা বাংলাদেশীক সমৰ্থন কৰিবলৈ গৈ প্ৰতীক হাজেলাই কোনোবা জেহাদী সংগঠনৰ পৰা টকা-পইচা সংগ্ৰহ কৰিছিল আৰু বাংলাদেশীৰ নাম এন আৰ চিত অন্তৰ্ভুক্ত কৰি দিছিল বুলি সন্দেহ হৈছে। জেহাদী সংগঠনৰ পৰা টকা-পইচা সংগ্ৰহ কৰি আৰু চৰকাৰৰ টকা হেৰ-ফেৰ কৰি এতিয়া প্ৰতীক হাজেলাই পলাবৰ কাৰণে চেষ্টা কৰিছে। এয়া উচ্চতম ন্যায়ালয়ৰ দ্বাৰা বদলিকৰণ নহয়। তেওঁ ইয়াৰ পৰা পলাইছে আৰু পলোৱাৰ বাটটো মুকলি কৰি দিছে উচ্চতম ন্যায়ালয়ৰ ৰঞ্জন গগৈয়ে। এ পি ডব্লিউৱে ৮০ পৃষ্ঠাজোৰা এফিডেফিট দিছিল সেইবিলাকৰ কোনো বিচাৰ-বিবেচনা নাই, তাৎক্ষণিকভাৱে প্ৰতীক হাজেলাক সুৰক্ষিত স্থানলৈ নিবৰ কাৰণে ৰঞ্জন গগৈয়ে ব্যৱস্থা কৰিছে।

অভিজিৎ শৰ্মা, এ পি ডব্লিউৰ সভাপতি

তেওঁক পলাবলৈ সুবিধা কৰি দিলে। যিটো সময়ত তেওঁক জেইলত ভৰাই থ’ব লাগিছিল আৰু ১৬০০ কোটি টকাৰ তদন্ত হ’ব লাগিছিল, বাংলাদেশীৰ নাম এন আৰ চিত সোমাল তাৰো তদন্ত হ’ব লাগিছিল। সেইবোৰ নকৰি এজন অসমীয়াই কঙালী বিহুৰ দিনাখন এজন দুই নম্বৰী আই এছ বিষয়াক মধ্য প্ৰদেশলৈ পলাই যোৱাৰ সুবিধা কৰি দিলে। তেওঁ মধ্য প্ৰদেশলৈ কোনোবা নাৰ্ছিং হোমৰ চি এম ডি হৈ যাব নে কোনো চৰকাৰী প্ৰতিষ্ঠানৰ বিষয়ববীয়া হৈ যাব? উচ্চতম ন্যায়ালয়ে কেতিয়াৰ পৰা বদলিকৰণ কৰাৰ কাম আৰম্ভ কৰিলে? এইটোহে বৰ আচৰিত কথা। পৰৱৰ্তী সময়ত উচ্চতম ন্যায়ালয়ৰ কাষ চাপিম। হাজেলাই গোটেই কামটোৱেই পইচা ঘটাৰ ৰাস্তা হিচাপে লৈছিল। আজি সেই কথাবিলাক প্ৰমাণ হৈ গ’ল। পইচা মাৰিলে আৰু এতিয়া জেইলত যোৱাৰ ভয়ত এওঁলোকক পলোৱাৰ সুবিধা কৰি দিলে।

শিলাদিত্য দেব, হোজাইৰ বিজেপি বিধায়ক

মই তিনিবছৰ ধৰি এইখিনি কথা কৈ আছো প্ৰতীক হাজেলা মানুহজন ঠিক নহয়, তেওঁ এজন দুৰ্নীতিপৰায়ণ বিষয়া। তেওঁ যদি দুৰ্নীতিত লিপ্ত নহ’লহেঁতেন তেন্তে আমি এখন শুদ্ধ এন আৰ চি পালোহেঁতেন। তেওঁক হত্যা কৰিব কোনে? যিসকলে হত্যা কৰিব পাৰে তেওঁলোকৰ নাম এন আৰ চিত সোমাই গ’ল। তেওঁ শংকিত নেকি যে, তেওঁৰ প্ৰতি ৰাজ্য চৰকাৰে কিবা একশ্যন ল’ব। তেওঁ যদি ভুল কৰিছে আমি তেওঁক বিচাৰি বিচাৰি মধ্য প্ৰদেশ ওলামগৈ। তেওঁ যি জাতিধ্বংসী কাম কৰি গৈছে মধ্য প্ৰদেশ কিয় তেওঁক আমেৰিকা আৰু লণ্ডনত গ’লেও বিচাৰি উলিয়াব লাগিব। তেওঁ নিজে অসমৰ পৰা বদলি বিচাৰিছে। হাজেলাৰ সৎ সাহস থকাহেঁতেন অসমৰ পৰা কেতিয়াও গুচি নগ’লহেঁতেন। হাজেলাৰ মনত কিয় ইমান ভয় আছে। হাজেলা মধ্য প্ৰদেশ যোৱাটো অসমবাসীৰ বাবে মংগল।