কেন্দ্ৰীয় বিদ্যালয়ত অসমীয়া ভাষাৰ পাঠদানৰ ক্ষেত্ৰত চলি থকা অনিশ্চয়তাৰ অৱসান
কেন্দ্ৰীয় বিদ্যালয় সংগঠনৰ এক নিৰ্দেশনাৰ পাছত বিগত সময়ত কেন্দ্ৰীয় বিদ্যালয় সমূহত অসমীয়া ভাষাৰ পাঠদানৰ ক্ষেত্ৰত চলি থকা অনিশ্চয়তাৰ অৱসান ঘটিছে।
গুৱাহাটীৰ লক্ষীৰাম বৰুৱা সদনত অসম সাহিত্য সভাৰ সৈতে কেন্দ্ৰীয় বিদ্যালয় সংগঠনৰ উপ-আয়ুক্ত চন্দ্ৰদ্বীপ নীলাপৰ যুতীয়া সংবাদমেলৰ অন্তত কেন্দ্ৰীয় বিদ্যালয় সমূহত অসমীয়া ভাষাৰ পাঠ্যক্ৰম বাহাল থাকিব বুলি উল্লেখ কৰে উপ-আয়ুক্ত গৰাকীয়ে।
অসমীয়া ভাষাৰ লগতে কেন্দ্ৰীয় বিদ্যালয় সমূহত বড়ো আৰু বাংলা ভাষাৰো পাঠ্যক্ৰম চলি থাকিব বুলি তেওঁ সংবাদমেলত সদৰী কৰে।
উল্লেখযোগ্য যে, বিগত ২৯ মাৰ্চত কেন্দ্ৰীয় বিদ্যালয় সংগঠনে জাৰি কৰা এক নিৰ্দেশনা অনুসৰি প্ৰথম শ্ৰেণীৰ পৰা দ্বাদশ শ্ৰেণীলৈ স্বাস্থ্য আৰু শাৰীৰিক শিক্ষাৰ পাঠ্যক্ৰম বাধ্যতামূলক কৰাৰ ফলত অসমীয়াকে ধৰি আন আন আঞ্চলিক ভাষা সমূহৰ পাঠদান বিদ্যালয়ৰ শ্ৰেণীৰ মূল সময়ৰ ভিতৰত কৰাৰ ক্ষেত্ৰত বন্ধ হোৱাৰ উপক্ৰম হৈ পৰিছিল।
আঞ্চলিক ভাষা সমূহৰ ক্ষেত্ৰত সৃষ্টি হোৱা এনে পৰিস্থিতিত অসম সাহিত্য সভাকে ধৰি বিভিন্ন জাতীয় দল সংগঠনে প্ৰতিবাদ সাব্যস্ত কৰিছিল। পৰৱৰ্তী সময়ত উপ-আয়ুক্ত নীলাপে বিষয়টো কেন্দ্ৰীয় বিদ্যালয় সংগঠনৰ শীৰ্ষ পৰ্যায়ত অৱগত কৰোৱাত ৰাজ্যসমূহৰ আঞ্চলিক ভাষাৰ পাঠদান পূৰ্বৰ দৰে মূল সময়ৰ ভিতৰত চলাই থকাৰ নিৰ্দেশ দিয়ে। তেওঁলোকে বুধবাৰে এই নতুন নিৰ্দেশনা জাৰি কৰে।
কেন্দ্ৰীয় বিদ্যালয় সংগঠনৰ এই নিৰ্দেশনাৰ পাছত আঞ্চলিক ভাষা সমূহৰ বিদ্যালয়খনত পাঠদানৰ ক্ষেত্ৰত দেখা দিয়া অনিশ্চয়তা সাময়িক ভাবে দূৰ হয়।