নাৰিকল পানী নে অ’ আৰ এছ: কোনটো অধিক কাৰ্যকৰী? জানক চিকিৎসা বিজ্ঞানৰ মত
সৌন্দৰ্য চৰ্চাই হওক বা শৰীৰৰ আভ্যন্তৰীণ যত্ন, নাৰিকল পানীৰ উপকাৰিতাৰ কোনো তুলনা নাই। নিয়মিতভাৱে নাৰিকল পানী খালে হজম শক্তি বৃদ্ধি পোৱাৰ লগতে শৰীৰত অতিৰিক্ত চৰ্বি জমা হোৱাত বাধা দিয়ে। ইয়াৰ উপৰি ব্ৰণ বা মুখৰ ক’লা দাগ আঁতৰ কৰি ছালৰ উজ্জ্বলতা ঘূৰাই অনাত ই বিশেষ ভূমিকা পালন কৰে। নাৰিকল পানীত থকা প্ৰচুৰ পৰিমাণৰ ভিটামিন এ আৰু চি-য়ে ছাল আৰু চুলিৰ শিপা মজবুত কৰে। আনকি ভঙা নখ বা ফাটি যোৱা ওঁঠৰ সমস্যা সমাধানতো ইয়াৰ অৱদান অনস্বীকাৰ্য। কিন্তু ইমানবোৰ গুণ থকাৰ পিছতো নাৰিকল পানীক অ’ আৰ এছৰ বিকল্প হিচাপে গণ্য কৰিব পাৰিনে সেই লৈ প্ৰশ্ন উত্থাপন হয়।
বিশ্ব স্বাস্থ্য সংস্থাৰ তথ্য অনুসৰি অ’ আৰ এছত এটা নিৰ্দিষ্ট অনুপাতত ছডিয়াম, পটাছিয়াম, ক্লৰাইড আৰু গ্লুক’জ থাকে, যিয়ে শৰীৰত ইলেক্ট্ৰলাইটৰ অভাৱ সঠিকভাৱে পূৰণ কৰে। আনহাতে নাৰিকল পানীত প্ৰচুৰ পৰিমাণে পটাছিয়াম, মেগনেছিয়াম আৰু প্ৰাকৃতিক চেনি থাকিলেও ইয়াত ছডিয়ামৰ পৰিমাণ যথেষ্ট কম থাকে। ব্যায়ামৰ পিছত বা শৰীৰত সামান্য পানীৰ অভাৱ হ’লে নাৰিকল পানী উপকাৰী যদিও ডায়েৰিয়া বা বমিৰ দৰে গুৰুতৰ পৰিস্থিতিত ই অ’ আৰ এছৰ দৰে কাম কৰিব নোৱাৰে। কাৰণ ডায়েৰিয়া হ’লে শৰীৰৰ পৰা যি পৰিমাণৰ ছডিয়াম ওলাই যায়, সেয়া পূৰণ কৰিবলৈ নাৰিকল পানী পৰ্যাপ্ত নহয়।
বিভিন্ন বৈজ্ঞানিক গৱেষণা আৰু বিশ্ব স্বাস্থ্য সংস্থাৰ প্ৰতিবেদনত উল্লেখ কৰা হৈছে যে তীব্ৰ পানীলগা বা ডায়েৰিয়াৰ সময়ত কেৱল নাৰিকল পানীৰ ওপৰত নিৰ্ভৰ কৰিলে শৰীৰত ইলেক্ট্ৰলাইটৰ ভাৰসাম্য বিঘ্নিত হ’ব পাৰে। চিকিৎসকসকলৰ মতে শিশু বা বৃদ্ধসকলৰ ক্ষেত্ৰত এই সমস্যাই অধিক জটিল ৰূপ ধাৰণ কৰাৰ সম্ভাৱনা থাকে। সেয়েহে অতিৰিক্ত বমি বা পেটৰ অসুখ হ’লে নাৰিকল পানীৰ সলনি বিশ্ব স্বাস্থ্য সংস্থাৰ দ্বাৰা অনুমোদিত অ’ আৰ এছ ব্যৱহাৰ কৰাটোৱেই আটাইতকৈ নিৰাপদ আৰু বিজ্ঞানসন্মত উপায়।