কেজৰিৱাল আৰু দিল্লীৰ উপ-ৰাজ্যপালৰ মাজত পুনৰ দ্বন্দ্ব : খাৰিজ কৰিলে কেজৰিৱালৰ সিদ্ধান্ত
দিল্লীৰ উপ ৰাজ্যপাল আৰু দিল্লীৰ মুখ্যমন্ত্ৰীৰ মাজত পুনৰ আৰম্ভ হৈছে দ্বন্দ্ব।
মুখ্যমন্ত্ৰী অৰবিন্দ কেজৰিৱালৰ সিদ্ধান্তক খাৰিজ কৰিছে দিল্লীৰ উপ ৰাজ্যপাল অনিল বৈজালে।
কালি দিল্লীৰ মুখ্যমন্ত্ৰী কেজৰিৱালে ঘোষণা কৰিছিল যে দিল্লীৰ চৰকাৰী চিকিৎসালয়ত কেৱল দিল্লীৰ কোভিড১৯ আক্ৰান্ত ৰোগীকহে চিকিৎসা প্ৰদান কৰা হ’ব।
আজি দিল্লীৰ উপ ৰাজ্যপাল তথা দিল্লীৰ দুৰ্যোগ ব্যৱস্থপনা কৰ্তৃপক্ষ(DDMA)ৰ অধ্যক্ষ অনিল বৈজালে এই সিদ্ধান্ত নাকচ কৰিছে।
DDMAৰ তৰফৰ পৰা জনোৱা হৈছে যে বহিঃৰাজ্যৰ লোক হোৱাৰ বাবেই কোনো লোকক দিল্লীত চিকিৎসা সেৱাৰ পৰা বঞ্চিত কৰিব নোৱাৰিব।
উপ ৰাজ্যপালৰ এই সিদ্ধান্তই দিল্লী চৰকাক এতিয়া অস্বস্তিত পেলোৱা দেখা গৈছে।
আনহাতে, মুখ্যমন্ত্ৰী কেজৰিৱালে দাবী কৰে যে উপ ৰাজ্যপালৰ এই নিৰ্দেশে দিল্লীত জটিলতাৰ বৃদ্ধি কৰিব।
দিল্লীত অপ্ৰতিৰোধ্য গতিত ক’ৰ’নাক্ৰান্তৰ বৃদ্ধি পোৱাত দিল্লীৰ মুখ্যমন্ত্ৰী অৰবিন্দ কেজৰিৱালে চৰকাৰী আৰু বেচৰকাৰী চিকিৎসালয়ৰ লগাই ১০ হাজাৰ বিচনা দিল্লীবাসীৰ বাবে সংৰক্ষণ কৰাৰ কথা ঘোষণা কৰিছিল।
ইফালে ক’ৰ’না লক্ষণহীন লোকৰ স্বাস্থ্য পৰীক্ষাৰো প্ৰয়োজন নাই বুলি দাবী কৰিছিল মুখ্যমন্ত্ৰী অৰবিন্দ কেজৰিৱালে। ইতিমধ্যে এই বিষয়টোৱে আদালতৰ মজিয়া পাইছেগৈ।
দিল্লী চৰকাৰৰ এই সিদ্ধান্তক অবৈজ্ঞানিক বুলি আদালত এক ৰাজহুৱা স্বাৰ্থজড়িত আবেদন কৰিছে ৰেণু গোস্বামী নামৰ এগৰাকী মহিলাই।
আনহাতে প্ৰাক্তন কেন্দ্ৰীয় বিত্তমন্ত্ৰী পি চিদাম্বৰমেও দিল্লীৰ চৰকাৰক সমালোচনা কৰিছে।
চিদাম্বৰমৰ প্ৰশ্নৰ, ‘দিল্লীবাসী কোন? কেজৰিৱালে স্পষ্ট কৰা উচিত। আমি দিল্লীত থাকি দিল্লীতে কাম কৰো, তেনেহ’লে আমি কি দিল্লীবাসী? যদি কোনো ব্যক্তিৰ আয়ুষ্মান ভাৰত প্ৰকল্পত নাম আছে, তেনেহ’লে সেই ব্যক্তিয়ে যিকোনো চৰকাৰী চিকিৎসালয়তে চিকিৎসাৰ সুবিধা পাব।’
ইফালে কেন্দ্ৰ চৰকাৰৰ নিৰ্দেশত দিল্লীৰ ৰাজ্যপালে দিল্লী চৰকাৰৰ বিৰোধী স্থিতি গ্ৰহণ কৰিছে বুলিও জানিব পৰা গৈছে।