জালুকবাৰীত হিমন্ত বিশ্ব শৰ্মাক প্ৰত্যাহ্বান জনোৱা কংগ্ৰেছ প্ৰাৰ্থী বিদিশা নেওগৰ মনোনয়ন বাতিল!
ভাৰতৰ নিৰ্বাচন আয়োগৰ তথ্য অনুসৰি, মুখ্যমন্ত্ৰী হিমন্ত বিশ্ব শৰ্মাই প্ৰতিদ্বন্দ্বিতা কৰা গুৰুত্বপূৰ্ণ জালুকবাৰী বিধানসভা সমষ্টিৰ কংগ্ৰেছ প্ৰাৰ্থীৰ প্ৰথমখন মনোনয়ন আজি (২৪ মাৰ্চ) পৰীক্ষণৰ সময়ত নাকচ কৰা হৈছে।
চৰকাৰী তথ্য অনুসৰি জালুকবাৰীৰ পৰা কংগ্ৰেছৰ প্ৰাৰ্থী বিদিশা নেওগৰ মনোনয়ন নাকচ তিনিখন কংগ্ৰেছৰ মনোনয়নৰ ভিতৰত অন্যতম। আন নাকচ হোৱা প্ৰাৰ্থীসকলৰ ভিতৰত আছে ঢকুৱাখনাৰ আনন্দ নৰহ আৰু হাফলঙৰ পৰা নিৰ্মল লাংথাছা।
বৰ্তমানলৈকে চলি থকা পৰীক্ষণ প্ৰক্ৰিয়াৰ সময়ত মুঠ ১৮ খন মনোনয়ন পত্ৰ নাকচ কৰা হৈছে।
ইয়াৰ বিপৰীতে শেহতীয়াকৈ কংগ্ৰেছত যোগদান কৰা হাফলঙৰ নন্দিতা গাৰ্লোছাৰ মনোনয়ন গ্ৰহণ কৰা হৈছে।
মনোনয়ন পত্ৰ নাকচ কৰাৰ আঁৰৰ কাৰণ এতিয়াও স্পষ্ট কৰা নাই বিষয়াসকলে।
মুঠতে ১২৬ জনীয়া অসম বিধানসভাৰ বাবে ৮১৫ জনৰো অধিক প্ৰাৰ্থীয়ে ১৩৮৯ খন মনোনয়ন পত্ৰ দাখিল কৰে। ৯ এপ্ৰিলত ভোটগ্ৰহণ অনুষ্ঠিত হ’ব, আনহাতে ৪ মে’ত ভোটগণনা হ’ব। প্ৰাৰ্থীত্ব প্ৰত্যাহাৰৰ অন্তিম তাৰিখ ২৬ মাৰ্চ।