ৰিয়াদত মৃত অৱস্থাত উদ্ধাৰ বিশ্ববিখ্যাত সংৰক্ষণবিদ ভিনচেণ্ট ভান ডেৰ মাৰৱে

চৌদি আৰৱৰ ৰিয়াদৰ এপাৰ্টমেণ্টৰ পৰা উদ্ধাৰ কৰা হৈছে বিশ্ববিখ্যাত সংৰক্ষণবিদ তথা প্ৰধানমন্ত্ৰী নৰেন্দ্ৰ মোদীয়ে আৰম্ভ কৰা ‘প্ৰজেক্ট চিতা’ৰ মূল সদস্য ভিনচেণ্ট ভান ডেৰ মাৰৱেৰ মৃতদেহ। এই ঘটনাই পৰিবেশ সংৰক্ষণ জগতত শোকৰ ছাঁ পেলাইছে।

আফ্ৰিকাৰ পৰা ভাৰতৰ কুনো ৰাষ্ট্ৰীয় উদ্যানলৈ চিতা অনাৰ ক্ষেত্ৰত ৪২ বছৰীয়া ভান ডেৰ মাৰৱেই গুৰুত্বপূৰ্ণ ভূমিকা পালন কৰিছিল। খবৰ অনুসৰি তেওঁৰ মৃতদেহ মূৰত আঘাত থকা অৱস্থাত এপাৰ্টমেণ্টটোৰ হলৱেত উদ্ধাৰ হয়।

যদিও বিষয়াসকলে কোনো সন্দেহজনক পৰিস্থিতিৰ কথা অস্বীকাৰ কৰিছে, তথাপিও ভেন ডেৰ মাৰৱেৰ পৰিয়ালে ফেচবুকত দাবী কৰিছে যে এইটো কোনো দুৰ্ঘটনা নহয়।

‘দ্য মেটাপপুলেচন ইনিচিয়েটিভ’ৰ প্ৰতিষ্ঠাপক হিচাপে ভান ডেৰ মাৰৱে কেৱল এছিয়াতে নহয়, আফ্ৰিকাতো চিতা সংৰক্ষণৰ বাবে সুপৰিচিত। শেহতীয়াকৈ তেওঁৰ সংস্থাটোৱে ছৌদি আৰব চৰকাৰৰ সৈতে চিতা প্ৰৱৰ্তনৰ পৰিকল্পনাত কাম কৰিছিল, যাৰ বাবে তেওঁ ৰিয়াদত আছিল আৰু তাতেই তেওঁৰ মৃতদেহ পোৱা গৈছে।

প্ৰধানমন্ত্ৰী মোডীৰ ‘প্ৰজেক্ট চিতা’ৰ সৈতে প্ৰত্যক্ষভাৱে জড়িত বিশেষজ্ঞসকলৰ ভিতৰত অন্যতম আছিল ভান ডেৰ মাৰৱে। ভাৰতৰ কুনো ৰাষ্ট্ৰীয় উদ্যানত দক্ষিণ আফ্ৰিকা আৰু নামিবিয়াৰ পৰা অনা চিতাক পৰিৱেশৰ লগত অভ্যস্ত কৰাৰ দায়িত্বত তেওঁ আছিল। প্ৰকল্পটোৱে সন্মুখীন হোৱা বিভিন্ন প্ৰত্যাহ্বান আৰু আইনী বাধাৰ মাজতো তেওঁ এই পদক্ষেপৰ প্ৰতি অপৰিসীম বিশ্বাস ব্যক্ত কৰিছিল।